電影版《衝上雲霄》開拍　陳法拉：冇收過通知

電影版《衝上雲霄》令「Sam」吳鎮宇及「Cool魔」張智霖再聚頭，並加入型男古天樂，陣容強勁，並鐵定六月開拍並到歐洲取景，至於之前在劇集《衝上雲霄II》奉旨和兩大型男談情說愛的「Holiday」陳法拉，究竟可否再續「前緣」，法拉就話唔清楚！

以連身短裙大騷玉腿及玉臂現身《盜馬記》首映禮的法拉，自言由於剛剛返港，故對電影版開拍不大知情。問到有否收到通知時，法拉說：「聽過劇本方面嘅事，不過冇收過通知。（驚會被飛起？）電視同電影係兩樣嘢，自己都好希望再同兩位舊拍檔合作，都希望電影同電視一樣有咁好嘅成績。」

雖然未知有冇份拍，但法拉已直言參演與否，跟無綫不續約是冇關係。她說：「佢哋（吳鎮宇、張智霖）都冇合約啦，電影有唔同因素要考慮，要遲啲先知。（如果冇得做會失望？）唔會，電視劇成40個鐘咩都拍過啦，而且個角色都好完滿。」談到電影版會加入型男古天樂時，她說：「古仔都好有新鮮感，自己都期待同古仔合作。」現在是自由身的法拉，對於未來動向又大賣關子，她說：「暫時未宣布得住，不過係傾緊電影嘅，希望可以快啲講到。」