惠英紅狂操備戰金像獎呻辛苦

影星惠英紅、陳友、張晉及顏卓靈等到文化中心出席《第33屆香港電影金像獎頒獎典禮》記者會，宣布盛會將於四月十三日舉行，記者會上公開紀念特刊內一眾準影帝、影后、男女配角、新演員及導演的造型，至於終身成就獎則頒發予曾執導《少林寺》及《黃飛鴻》的資深導演張鑫炎。

提名女配角的惠英紅身穿低胸裝出席，問到屆時行紅地氈會否更性感？她笑說：「我冇嘢露，露吓韻味，最近不停做運動Keep fit，我拍開動作片，做gym都覺得辛苦，做掌上壓求個教練可唔可以減五下，呢排淨係食麥皮、水果，希望以最Perfect狀態出席。」

問到是否有信心獲獎？她表示對手很強，提名人中有四個是影后，劉嘉玲、童星李馨巧及杜鵑都有過人之處：「小妹妹（李馨巧）好犀利，有兩個影后，思維好快，所以我輸畀任何人都無話可說。（咁想唔想得獎？）想！入得試場都唔想肥佬o架嘛！」