鍾楚紅開慈善相展唔預發哥

「紅姑」鍾楚紅現身馬鞍山郊野公園，出席地球之友植樹活動。支持環保近廿年的她自爆熱愛種樹：「所有有生命嘅我都鐘意，種多啲樹可以令動物多啲地方棲息！」

她又稱將於今年內開設慈善相展：「相展關於香港同綠色環境，都會影吓我平時行山的地方，（相展有你的靚相？）睇情況，影得我靚咪擺出嚟。會影吓人，但以影景為主！」

問到會否預埋影相發燒友周潤發？她笑住嫌棄發哥太高級：「佢咁高級，唔預佢！佢一日先影一張！（你用咩器材影？）我會上直升機影落嚟！（畏高？）唔會，上到去會集中晒搵靚景！（影相期間有否遇危險？）風雲變色就最多變落湯雞，但我都會保護部相機先。不過最近天氣唔好，冇心情影，預計今年內開得成（相展）。」

談到製片人張家振有意找來「宅男女神」陳妍希、「都教授」金秀賢及黃曉明重拍電影《縱橫四海》，問她覺得若陳妍希重演當年自己的角色會如何？她即稱對方「唔好似我」：「人哋又後生又青春又靚女，唔好似我，每人都有自己風格，唔應該似我，導演拍得好就得，（由金秀賢演張國榮角色，黃曉明演發哥？）幾好呀，靚仔靚女！」