王貽興婚配網站搵女友

王貽興今日以榮譽會員身份，到中環出席吳美玲（Mei Ling）創辦的婚配及生活網站記者招待會。貽興希望網站能令單身男女不要怕醜，勇於面對婚姻問題。同時又指在網上亂識朋友，可能會焦頭爛額，網站能保證他們找到好姻緣。問到有否需要用該網站？貽興就坦言有需要：「因為好老實講自己識人都幾冇保障，你未必知道對方行埋嚟有咩目的，亦都未必make sure對方係咪同你認真交往，定係玩玩吓就算。你知依家女仔集郵仲猖狂過男人o架啦。」

問到現時感情狀況？他就表示自己好認真找尋穩定關係，亦有對象，但都要用時間去了解。問到Mei Ling有否「贈兩句」？貽興就話Mei Ling叫他「放眼世界」。雖然網站和貽興都以華人為目標，但姻緣到的話就外籍人士都無所謂，可能會刷出新火花，但他說：「但自己喺香港未必有機會試啦。喺網上、facebook亂識嘅時候，分分鐘嗰個係男人你就瀨嘢！」又笑指自己不會像荷里活巨星占士法蘭高因網上交友不慎而墮入裸聊陷阱：「緊係啦，要愛惜自己身體，媽媽話唔好o架！」

至於無綫工作，剛完成節目《我要做老闆》貽興指自己兩星期後會離港，到台灣、內地、東南亞拍攝至六月尾。不過貽興又透露拍攝時間撞正五、六月的趕書期，寄望旅程中可以抽時間寫書在書展推出：「我諗趕到三本書都開心！」

至於創辦人Mei Ling就指網站是為普羅大眾而設。而貽興是首個入會的會員。問到貽興條件如何，她就指貽興不差。至於貽興的缺點？她笑說：「咁你要問埋佢喇！」