生蛇過來人　顏卓靈阿旦呼籲打預防針

影壇新貴顏卓靈（Cherry）、藝人鄭丹瑞（阿旦）及韓馬利今日出席醫學記招，阿旦透露去年復活節母親過世，他接受不了事實，翌日身體即出現「生蛇」，在飛往加拿大奔喪時更流膿，經過3個月治療才康復。談到昨日母親節，阿旦笑說：「我大哥一家尋日喺加拿大掃墓，我同佢視像，叫埋太太、囡囡一齊向墓碑鞠躬，我話以後清明、重陽都可以照做。」

而Cherry亦同樣試過「生蛇」，更因搽錯類固醇導致情況愈來愈嚴重，如今背部更留有疤痕：「呼籲大家打預防針好緊要，所以大學考緊試都要嚟。講真，我壓力唔大，大學考試答案有時考創意，我有信心可以升班讀埋最後一年。」她又指暑假才會投入電影拍攝工作。