車車當「人肉GPS」帶媽媽遊台灣

藝人車車（張紫櫻）早前與兩位姐姐偕母親到台北旅行慶祝母親節，每年遊台北不少於五、六次的車車，連做孝順女也不忘選台北作為目的地，旅程中發揮「人肉GPS」功能，她說：「我哋去到士林夜市，竟然有加拿大遊客走埋嚟問我路，真係好搞笑！我喺夜市度發現超抵買鴨仔造型棉花糖，兌番港幣都係20元左右，造型夠cute，味道又甜，夠晒抵！不過畀貼士大家，啲棉花糖接觸到空氣，好快就會『瘦身』，縮咗水就冇咁cute！所以影完相，玩完一大輪先好拆袋！」

車車的「台灣味」更引來星探搭訕，她說：「我都唔肯定佢係咪呃人？佢話係電視台嘅工作人員，嚟近有個新節目，覺得我好適合，問我有冇興趣，當時又熱我又拎住好多嘢，都冇心機聽佢講，我就話：『我不是台灣人』，佢聽完就放棄咗，乜我個樣真係咁台灣人咩？」