杜宇航「窮住愛」沉醉溫柔鄉

最新一期《好報》大爆杜宇航圖起師傅冼國林飛腳解約，並犯下「七宗罪」馨竹難書。《好報》更拍得杜宇航連日來冇戲開，惟有沉醉溫柔香，好把全副精力寄情拍拖，過住愛得Cheap的同居生活。二人幾乎天天在寓所附近的黃埔一帶出沒，不是去睇戲，就是到碼頭吹吹風。

本月初，二人又睇戲打發時間，胡敏珊冇分彼此，親自排隊買粟米片及汽水餐盛惠46元，入場與男友分甘同味。散場後二人亦唔願返屋企，寧願在海濱長廊談情，像老夫老妻般肩並肩而坐，看看海吹吹風享受免費娛樂，又各自猛篤手機，吹風一輪後才結伴返寓所。據知，「杜胡」平日甚少下廚，連日所見，杜宇航不時將女友「禁室」家中，自己獨自出街買外賣，經過花店，亦精挑細選買了兩支平靚菊花在家中點綴，慳到冇朋友。

除外套擋雨

日前，二人看來食味精食得多，終於想下廚整番幾味。二人出動往北角買海鮮，從寓所出發往碼頭期間，突然下起大雨，杜宇航Man爆脫去外套與女友擋雨，相當細心。上船前，二人在汽水機買紙包飲品，一盒兩份飲之餘，又突然起勢喪玩手指，篤來篤去，其實只要愛得夠真，愛得「Cheap」又如何。登船後，胡敏珊見攰挨落男友膊頭休息，一切盡在不言中。

到了北角，雖說買海鮮，但二人選擇並非貴價海產，主攻泥鯭及一些貝類海鮮，不消半小時便乘船打道回府，並拿着一袋泥鯭慢步返回寓所。