呂方與中女高妹街市拍拖半同居

自與鄭裕玲分手後，自稱成功越獄的呂方變番冇腳雀仔，近年寄情「食散餐」，但飛了六年始終會攰，最新一期《好報》拍得呂方搭上「中女高妹」，私藏住家菜，雙方更發展至半同居關係。

日前下午四時許，呂方從大坑寓所出發，獨自駕駛寶馬戰車到鰂魚涌做健身，出完一身汗後依然精力旺盛，隨即踩油到灣仔世紀酒店等人。車內等了一會，一名年約30多歲、身材高挑兼皮膚白皙的中女現身，熟練地坐在司機位隔離，十足老夫老妻一樣，原來這名「中女高妹」便是呂方的私房住家菜！

據知，廚藝了得的呂方喜歡在女友面前騷「哥利」下廚一番，絕少出街食飯。當日見呂方直奔天后附近的街市，他落車後即指手劃腳叫女友去買菜，完全沒有商量煮乜食乜，自己便分道揚鑣到海鮮檔買海鮮。呂方揀食材時十足專家一樣，拎上手已知斤兩夠不夠，然後付買了條斑及一些貝類海產。

買完海鮮，「中女高妹」亦完成買菜任務，急急走到海鮮檔會合男友。一見女友到來，呂方索性連餸都唔拎，一聲喝令便把餸袋遞給女友，幾咁威風呀！不過「中女高妹」突然有嘢想買，再把餸袋遞回男友。兩人並肩而行時，「中女高妹」足足高呂方半個頭，但他勝在着得夠型，恤衫加七分褲，再着鞋唔着襪，認真霸氣十足。冧女要軟硬兼施，威風完的呂方突然撒嬌掹女友衫尾博紅顏一笑，御女術已到達爐火純青的境界。

期間，有豬肉檔屠夫認出呂方，見他有女伴即口痕大嗌：「條女真係索過嘟嘟！」只見呂方先行取車，女友則到附近的服裝店買衫，十蚊就有交易，可謂持家有道。為免男友久等，「中女高妹」急急腳上車，期間再落車到投注站幫手買六合彩，最後萬事俱備下，兩人一同返回呂方大坑寓所慢慢歎二人世界！

「中女高妹」知慳識儉，呂方卻使錢無極限，日前他現身銅鑼灣名店置裝，見自己有選擇障礙症，立即撥輪叫女友入店內幫眼，真係隨傳隨到。不過說實話，呂方錫女友錫到燶，不時充當「柴可夫」管接管送，女友度完春宵欲返回愉景灣老家，他總會親自車出車入。可是沒有女友的日子，呂方的生活卻顯得相當頹廢，瞓醒就落街求其買個三文治及一杯咖啡便一日，寧願呆在家中等運到。