楊冪誕女:劉丹爆威冪見「小糯米」感動落淚

20140601
東網電視
更多新聞短片
威冪結婚時都已經眼濕濕,見到自己囡囡出世當然都會感動到喊啦!而榮升爺爺的劉丹就做代表出嚟見記者。

大陸女星楊冪為劉愷威誕下女兒,劉愷威父親劉丹榮升爺爺,自然心情超興奮,他接受電話訪問時難掩喜悅之情,表示相當開心,笑言正隔住玻璃看着精靈可愛的孫女,大感心滿意足,他透露孫女約七磅重,並說:「新抱(楊冪)尋晚入院,原本諗住順產,但因為BB女頭太大,佢好痛,醫生建議開刀,大約係今日中午時份出世,母女平安,新抱生完開心到喊咗出嚟,阿威都好感動,有幫手剪臍帶,剪一下都手騰腳震,好緊張。」他透露楊冪出院後會留港在男家調理身子,並已請陪月照顧她,而因BB女在端午節前一日出世,一出世就有糭食,故暫時乳名叫「小糯米」。

劉丹見BB好感觸

下午約二十多名記者到達半山港安醫院等候消息,劉愷威及楊冪派出劉丹步出醫院接受訪問,劉丹提起孫女即多次笑得見牙唔見眼,問到BB女似邊個?他說:「我同我老婆意見唔同,我覺得個嘴似阿威,老婆就話似楊冪,等過多日兩收咗水先睇得清楚。」他透露劉愷威連日都會在房陪老婆,暫不會露面,問到楊冪身邊狀況?劉丹說:「生完BB梗係攰,佢最想係食嘢,好多個鐘頭冇食,但仲有啲麻醉藥,未食得嘢住。(抱得BB未?)未,我都係離遠望,望見佢,覺得好精靈,佢哋推出產房時,我第一次見到BB,好感觸,嗰剎那講唔出嘢,心諗呢個就係我嗰孫喇!」他又爆劉愷威幫手剪臍帶時落淚,但並非驚血,而是感動,至於BB女名字,劉丹表示已開始構思,會按筆劃搵專人改名。