Chilam邀拍MV　董嘉儀女神下凡

董嘉儀（大埔LuLu）本來只活躍於網絡界，被宅男捧為「女神」，直到今年初，她在演藝事業中遇到好人好事，令她由網絡界走入娛樂圈，這位伯樂就是張智霖（Chilam）！Chilam在構思翻唱歌《你是如此難以忘記》的MV時，有意找來各大女神助陣，結果睇中了前足球大使LuLu，她說：「今日多咗咁多人識我， Chilam畀我參與佢MV係一個好重要嘅關鍵，當時佢係WhatsApp搵我，我覺得個MV有陳法拉、謝安琪，我又點會夠班，但佢就話我好有特色，叫我畀啲信心。」

到了拍攝場地後，LuLu表示對Chilam的第一印象就是有禮貌、冇架子：「我跳舞跳得差，佢都會笑笑口叫我加油。（點報答恩人？）我冇咩能力報答佢，我哋真係差太遠，我估做好自己就已經係最好回報。」而運動評述員馬啟仁（Keyman）是LuLu第二位恩人，情同父女：「佢幫咗我好多，教我做主持、介紹工作畀我，有咩問題佢都會教我應付，係好好嘅『Keyman爸爸』！」