李玟香港開騷好興奮　遺憾未跟梅姐合作

歌手李玟（CoCo）與音樂人趙增熹亮相TVB娛樂新聞台節目《李玟x趙增熹StarTalk》，接受主播許文軒（Edmond）訪問，今年入行20周年的CoCo，將首次在香港舉行演唱會，她說：「我興奮到瞓唔着，日日掛住記歌詞，演唱會以八、九十年代經典歌曲為主，有譚詠麟、梅艷芳同張國榮（哥哥）嘅經典作品！」

COCO細個會跟蹤「校長」

CoCo自爆兒時是「校長」譚詠麟的小粉絲，她說：「我同校長住同一區，周不時會撞到佢，我仲會跟蹤校長，畀佢發現咗，我就扮路過，嗰時真係好興奮！當我知道請到校長做我演唱會嘉賓，壓力好大！」

趙增熹則憶述入行初期已與張國榮、梅艷芳等巨星合作的點滴，他說：「我要多謝張國榮嘅鼓勵，哥哥曾經話睇好我30歲前可以出人頭地，好巧合地我30歲嗰年，做咗張學友音樂劇《雪狼湖》嘅指揮，電影《甜蜜蜜》又為我攞咗香港電影金像獎最佳電影配樂，之後諗番覺得哥哥好準！佢嘅鼓勵對我作用好大，令我工作更有信心。」

拎Bar扮梅姐

阿熹提到梅艷芳亦讚口不絕，他說：「梅姐份人好平實，對身邊人好好，絕對冇高不可攀嘅感覺，梅姐雖然冇明星架子，但絕對有明星風範！」CoCo聞言大嘆：「可惜我未同梅姐合作過，我細個時會攞住媽咪啲Bra，扮梅姐壞女孩唱片封面個Look！」

阿熹又爆為吳君如、古天樂及田蕊妮做歌曲監製是非常辛苦的差事，他說：「辛苦在大家都要付出額外嘅努力去做，要花多好多時間去完成，好似吳君如咁，佢一錄唔到就大笑；阿田就被我折磨，唔到限期我都唔收手，古仔本身係唔太鍾意唱歌，佢間公司有病，不過如果做騷有自己歌，係個好好嘅渠道，令收入更可觀，同有多啲唔同機會。」

阿熹睇好G.E.M

CoCo被問到生BB計劃，她說：「暫時冇計劃，我知足我現在所擁有嘅，我老公好好，阿Bruce（李玟丈夫）啲小朋友又乖，佢哋仲會介紹我聽唔同類型嘅歌，我哋相處得好好！」阿熹被問一仔一女會否想入行，他說：「唔好啦，我唔識欣賞佢哋鍾意嘅音樂，好嘈！我睇好G.E.M.，仲有香港樂隊Mr.咁，佢哋歌好有自己Message！」