娛樂專題:朱璇性感尤物 拋開包袱搓圓㩒扁

20140623
東網電視
更多新聞短片
朱璇希望觀眾可以把視線由她的性感轉到留意她的演技。
前華姐冠軍朱璇絕非「得個殼」,曾在法國修讀戲劇的她,2010年憑處女作提名「最佳新演員」,實力非同凡響!朱璇在無綫奮鬥多年後,開始於電視圈嶄露頭角,但她不甘於只當性感尤物,最想挑戰變態、反派角色,尤其想跟「醜男」做對手戲。
入行六年的朱璇於2008年勇奪華姐冠軍,曾在法國修讀戲劇表演的她,當選翌年即為電影《淚王子》擔正女主角,其後更憑該片分別提名金像獎及亞洲電影大獎「最佳新演員」。一直在無綫默默耕耘的她,去年參演多部劇集包括《戀愛季節》、《女警愛作戰》及《情越海岸線》等,終憑「變性人」一角彈起,首度入圍台慶頒獎禮「飛躍進步女藝員」。
樂做醜角
但對於朱璇來說還有漫漫長路要走,她盼望能嘗試不同角色,即使扮醜也不介意:「我好想有突破,唔想成日做靚女、正經同溫柔嘅角色,我想做性格複雜啲,或者挑戰大啲嘅媽媽、變態、反派。我冇限制自己想做咩,有好角色、劇本都可以嘗試,呢個先係做演員嘅樂趣,如果一路行一條線,做死一樣嘢都幾悶。不過,我鍾意內心戲多啲、節奏慢啲。」她又笑言需要的話可以素顏出鏡:「我就唔驚嘞!唔知睇啲人驚唔驚呢?(你有自信?)我肯做囉!要我哨牙都冇問題,我都渴求呢啲角色。」
至愛蔣志光
一般而言,女藝人都幻想與靚仔小生、影帝或視帝合作,不過朱璇卻指跟無綫小生經常見面,令她失去了幻想空間,反而希望與曾合作《仁心解碼II》的性格演員蔣志光合作:「之前佢教我講廣東話,我覺得佢好識得教人、分享演技,睇過佢好多劇都做得好好。」雖然她對合演角色冇限制,但笑言沒想過跟對方扮情侶,那麼拍咀戲呢?朱璇笑說:「嘩!冇諗過呢樣嘢,我唔敢想像!我唔會無啦啦幻想同蔣老師拍Kiss戲囉!好變態呀!」原來她亦喜歡「醜男」對手,至愛英國演員伊雲麥格高(Ewan McGregor):「我鍾意啲唔靚仔嘅實力派,可能係感覺,演員唔一定要睇樣,當然好多靚仔演員做得好好,但反而覺得性格派嘅演員啲戲幾好睇。」
半鹹淡廣東話成障礙
來自北京的朱璇坦言其「唔鹹唔淡」廣東話,成為在港拍戲的一大障礙:「好多嘢都做唔到,譬如同人嗌交、做好奸嘅角色,我一講嘢人哋已經笑咗,我講嘢又慢又唔準都幾影響!其實我好鍾意舞台劇,讀書時都有玩過,但做嘢就冇試過,始終喺香港有語言問題。」她又渴望北上拍劇賺人仔,盼TVB多給予機會:「以前夢想係可以用普通話或法文做一套戲,咁我就滿足喇!如果去內地發展嘅話,我都想試吓演宮廷、古裝戲。」
朱璇閒時最愛看法國、德國及北歐等文藝片,對《淚》片導演楊凡尤其欣賞:「佢畀我睇到一個藝術家係點,佢好堅持追求自己想要嘅嘢,唔計較錢同名氣,好值得人佩服。(你唔希望名利雙收?)每個人際遇唔同,我希望演到自己想做嘅角色,其實我都唔係好大使,夠用就得。」
談到無綫劇集大眾化,豈不是難以滿足其「文藝夢」?朱璇則認為拍劇是很好的訓練,並笑言加入《愛.回家》後逐漸跟上劇組的節奏:「之前唔知電影同劇集嘅分別,以為一個鏡頭可以幾分鐘,乜嘢反應都好慢,搞到成日畀人鬧,可能香港人同法國人嘅節奏差好多,香港人嘅效率係法國人嘅十倍。」
性格被動蝕底
要在一眾藝人中突圍而出,外貌與實力兼具的朱璇卻欠一點主動,她自言是個「宅女」,怕醜未敢向監製、導演自薦:「我唔識得去要求、講唔出口,通常都係同人打個招呼就走。我認為人哋覺得一個角色啱我做就會搵我,即使我去搵人哋唔啱就係唔啱。(你比較蝕底?)係,我性格好被動,但我接受咁樣嘅自己。我相信有啲嘢係我嘅,第二啲人搶唔到,拍劇都係睇緣分,有緣就會合作。」回想當年提名新人獎,朱璇認為處女作仍有許多進步空間:「嗰時未拍過戲乜都唔識,乜係燈光、機器都唔識,成日攞住把遮遮住自己,又成日走錯位。(但你都入圍?) 係個電影同角色好啫!唔關我事,加上導演楊凡幫咗我好多。」
另類魅力俘虜宅男
女人味十足的朱璇,鏡頭前落落大方,扮演女神、嬌嬌女也維肖維妙,但原來面對群眾時,她依然感到不自在,更不太喜歡去蒲。始終26歲仍年輕,朱璇私底下還是個大細路, 閒時愛留在家中睇漫畫,受訪當日更不時露出頑皮本性,擺出趣怪鬥雞、伸脷表情,真係「好Pure好True」,難怪輕易俘虜一眾宅男。