陳豪食中藥補身:想追個女

20140626
東網電視
更多新聞短片
陳豪以御藥堂品牌形象大使身份現身中文大學。
藝人陳豪以御藥堂品牌形象大使身份現身中文大學,出席《「中大中藥傳承」「中醫藥導賞團」暨品牌形象大使簽約》活動,大會播出陳豪一人分飾兩個「陳豪」嘅廣告片,其中更有「女人殺手?退咗休啦!」嘅對白,陳豪話:「我都好鍾意廣告概念,啲對白都好切合我,(對白提到嘅「傷口」係指咩?)已經被中醫醫好咗啦!」
佢又自爆同中藥甚有淵源,佢話:「大家未必知道,其實我爸爸係西醫,我媽媽係中醫,我細個都有跟過媽咪啲師傅做暑期工,拔火罐、艾灸,我都OK㗎,強項係醫瞓『厲』頸!(點解唔行醫?)我都唔知點解。」
陳豪提到老婆陳茵媺因抱乖仔梓燁,導致左手出現筋膜炎,佢話:「呢個係喺媽媽身上好普遍見到嘅問題,(有冇為老婆以中醫方法治療?)其實乜都做過,令問題唔好惡化,好難叫佢減少抱BB,始終係自己湊,佢都放唔低啦!我有幫手,但呢個係無可奈何嘅問題,佢已經戴咗嘢固定手腕,so far情況幾好,我就幫佢有限度嘅指壓。(茵媺怕咗唔敢再生?)唔會,呢啲係母親必經階段,唔係咩新奇病,點樣用正確姿勢同力度先值得大家留意。」
陳豪坦言想再做爸爸,佢話:「我想追個女,咁就完美,父母親要盡責任,唔好令仔女咁孤單。我希望係咁啦!不過畀佢放吓假先,小朋友仲細!」
陳豪又話:「啲產品我會試食,因為我深信中醫,少化學作用,調理身體好有幫助!Aimee(陳茵媺)都有以中醫調理身體,中西互補。」