被台男搞大肚兼離婚？　Yumi反擊：有人眼紅我！

「鹹魚翻生」的o靚模尹蓁晞（Yumi），近日黐實男友、周秀娜舊愛陳偉成（Avis）出騷掘金，舉動愈來愈高調，惹來有人「爆料」指她去年底與台灣有米男模蔣鍇儒（Cairo）離婚兼曾秘密生仔，激得Yumi寸爆反撃：「有人唔抵得！」

現年26歲的o靚模尹蓁晞（Yumi）近日經常孖男友陳偉成（Avis）高調出巡，以情侶檔上節目及出席活動晒恩愛，還搶埋周秀娜飯碗投資胸圍生意，「峰」頭可謂一時無兩，終於樹大招風！近日有人翻其舊帳，指Yumi不僅2011年與台灣富貴男模「老公」蔣鍇儒（Cairo）閃婚兼有孕，更加推兩大「控罪」，直指兩人去年底才離婚收場，Yumi更疑似秘密生仔。

查實這位有「嫩版吳尊」之稱的蔣鍇儒為台韓混血兒，現改名為金鍇儒，家人在美國搞生意。體校畢業的他曾考上特警，但一心闖演藝圈，並於六年前參加世界男模大賽，勇奪地區賽冠軍，隨即正式入行成為模特兒。曾來港工作的蔣鍇儒當時曾獲邀返台發展，但最後因公司倒閉，輾轉做了一年健身教練維生。直至去年，他簽約「時代金點影藝有限公司」，陸續客串演出電視劇《光環之后》及《單身有約》，現時專注拍劇。

「一直食避孕藥」

記者致電Yumi了解事件，她口窒窒否認指控：「點解傳啲咁嘅嘢？冇結婚、冇離婚亦冇生仔！（有冇墮過胎？）從來都冇，一直有食避孕藥。」愈講愈火滾的她繼而「挑機」反擊：「如果有證據就攞出嚟！根本無中生有中傷我，可能有人唔抵得，因為我依家事業OK，眼紅我出活動！」問到是否暗寸Avis舊愛周秀娜時，Yumi只說：「我唔知道，估唔到。」

其實Yumi於2008年加盟大名娛樂後即被力捧，可惜因失場而被無限期雪藏，無路可走下敗走台灣，直到2011年突然傳與Cairo閃婚，後來網上更瘋傳其疑似大肚相！對於該張「證據」，她順道澄清：「當日着住娃娃裙，有風吹起啫！」她又稱毋須向Avis報定案：「我同Cairo拍拖嗰陣已經識Avis，而Avis亦已經知道我哋拍拖。」