攬啜又上門　Ashina發毒誓證清白

盛品儒偷嗒有「翻版謝安琪」之稱的o靚模Ashina！二人「情到濃時」更當街攬啜，「街戰」後Ashina直闖男方寓所十五分鐘。被指當上小三的Ashina透過《東網》澄清，發毒誓力證自己非小三！

酒後無戒心

攬啜事件女主角是港版AKB48大堆頭性感o靚模組合Super Sexy Hero的新人郭奕芯（Ashina），現年十八歲，Ashina在經理人陪同下接受《東網》獨家專訪回應事件，在開始接受訪問時已眼水汪汪，表示當晚與盛品儒幾杯酒落肚帶有醉意，令自己放下戒心，不過就拍心口否認情侶關係，澄清與盛品儒純屬朋友：「當時有啲醉意，加上我無乜戒心，但我唔係一個咁嘅女仔。」

傾完公事去玩吓

Ashina表示與盛品儒見面不多，當晚是因對方「傾公事」才赴約：「公事上有嘢要合作就出咗去，（攬錫係傾公事？）其實我都好無奈，唔知點解會咁。（你哋去咗唱K喎。）我傾完公事，講完正經嘢大家就去飲酒玩吓，可能意識放鬆咗，飲多咗少少。當時大家有醉意，因為搵唔到的士，所以先有拉扯嘅行為。（你識唔識佢女友？）唔識，之前有睇過報道，但其實我哋之前傾偈，佢冇正面講過佢有女友。」

飲一公升烈酒

問到Ashina飲了多少酒，她即以手比出酒樽的大小，示意二人大概飲了一公升烈酒。問到她是否酒量好好？她就予以否認：「唔係，但意識到放鬆咗。（係咪情到濃時？）絕對唔係，我同佢係普通朋友關係，我同盛生真係無嘢。」

年齡相距一倍

Ashina更坦言自己與盛品儒年齡差距大，絕對無可能拍拖：「（佢追你？）你哋自己問佢啦。（你對佢有無意思？）絕對無可能，佢大我一個Dou（Double），同埋我一開始係朋友心態，無諗過之後嘅事。」

承認到男方寓所

對於二人搭的士到盛品儒北角的寓所，女方更入屋逗留足足十五分鐘才落樓，Ashina承認自己送盛品儒返屋企及入屋，不過就送完即閃，絕無下文：「佢好醉，我純粹送完佢返屋企就走。（計過都有十五分鐘喎！）咁上落都要時間，我有入到佢屋企。（佢有無留你？）有少少擾攘，但我始終都係走。（佢有冇送你落樓？）冇，佢已經好醉，冇都唔覺有咩問題，我哋係朋友。」

公司訓話唔好信錯人

爆出「攬啜事件」後，Ashina坦言與盛品儒有聯絡，當記者問到她會否發誓自己非小三，不甘被冠上小三之名的Ashina即舉起三指發毒誓自己沒有入盛品儒與蔡一鳳的關係當中，澄清自己絕非小三。問到公司有否訓話？她說：「都有叫我唔好飲酒，唔好信錯人。其實我本身唔係好鍾意蒲，一大班人出嚟玩，都係生活一部分。」