袁潔瑩情緒病導致23歲停經

女星袁潔瑩現身有線電視節目《星級會客室》分享經歷厭食症和情緒病的人生低潮。自十五歲起加入娛樂圈的潔瑩事業一帆風順，後因為患上厭食症，體重一度跌至不足八十磅：「嗰時因為要出唱片，但係我對唱歌冇信心，所以成日去做運動練氣，一邊做運動、一邊唱歌；後來人人都讚我靚咗，我因為唔識諗，以為瘦就係靚，所以繼續瘋狂做運動同唔食嘢，每日只食一個青蘋果。」後來更因為體重過輕而引致身體機能失調，誘發情緒病：「我嗰時廿三、四歲，但停咗月經，仲開始避開見人，爸爸媽媽喺屋企，我就開車去遊車河，知道佢哋出街，我先返屋企。」

談到愛情觀，袁潔瑩坦承自己愛得激烈：「我對愛情係好執着，我都知自己迫到人哋透唔到氣，細嗰時仲非常刁蠻同任性，成日發小姐脾氣。可能因為我通常同大我十年以上嘅人拍拖，所以被寵壞咗。」而父親更送上愛的提示：「爸爸話我啲性格麻煩，千祈唔好結婚、唔好生仔，只要有個伴侶肯愛我同錫我你就夠喇！」

自認唔勤力

當談及演藝工作曾經停頓了長達九年時間，問日子如何度過？袁潔瑩笑言這段時間以吃喝玩樂重整自己，總結自己多年來的演藝事業，認為自己已經不枉過：「雖然覺得自已可以再做好啲，但係都算合格啦！因為我唔算係勤力演員。我拍完戲，收咗人工，就去玩，去拍拖同蒲。」