父母反對進娛圈　億萬千金陳鈺芸為理想堅持到底

武打女星陳鈺芸（JuJu）以真功夫殺入娛樂圈，原來打女背後是坐擁逾億萬家財的富二代，有千金唔做竟心甘命抵學功夫練拳，淪為「人肉沙包」搞到周身傷，全因喜歡做演員！JuJu正身處新西蘭拍攝第三部荷里活電影《臥虎藏龍2》，更聲言要做「女版甄子丹」一個打十個！

「千金」JuJu絕對是含住金鎖匙出世，父親陳源瀚是跨國公司亞太區總裁，坐擁逾億元雄厚身家，JuJu與父母及孖生姐姐居於貝沙灣的二千呎豪宅，自小過着無憂無慮的千金小姐生活。但JuJu很有個性，並不樂於做一隻金絲雀，反而「有自唔在、攞苦嚟辛」，走去學功夫，打完跆拳道又打泰拳，莫非恨做明星可以去到好盡？JuJu說：「不嬲鍾意用行動、實力證明自己，唔鍾意靠屋企或者出面嘅關係，想用自己雙手同能力打出事業，而揀做打女係因為我鍾意運動、鍾意打功夫，如果想喺娛樂圈發展就要有一個定位，我覺得行打女路線最適合自己！」

謝絕父母觀戰

JuJu並沒有順口開河，正當不少富二代忙於吃喝玩樂、Shopping扮靚之際，JuJu在過去三年卻不停練武操拳，半年前更開始打泰拳，在拳館充當「人肉沙包」學捱打，以致身上瘀傷處處，視JuJu為掌上明珠的父母自然大感心痛兼反對她入娛樂圈，JuJu說：「特別係媽咪，佢好唔鍾意我打功夫同做娛樂圈，佢哋唔係娛樂圈人，覺得呢個圈好複雜，佢哋亦唔識打拳，覺得係危險運動，所以屋企嗰邊有好多難關要過，有同阿爸講我已經大個女，有自己理想，會為自己做嘅事負責。」為免母親擔心，JuJu拍動作戲及參加拳賽亦一律「謝絕探訪」：「阿媽睇到我怕佢好緊張，自己又會有壓力，試過臨出發去尼泊爾打拳擊賽前一晚，阿媽問我唔去打得唔得，佢好擔心，我惟有同佢解釋打拳都有安全措施，要說服佢囉！」