娜姐一句話改寫鄭丹瑞結局

電影《分手100次》導演鄭丹瑞（旦哥）連日來與男女主角鄭伊健和周秀娜（娜姐）到港九各大戲院向觀眾謝票，由於昨晚是謝票的第一百站，邀請演員之一的錢嘉樂及為音樂大師陳光榮一起突襲觀眾，送上驚喜。

活動期間，旦哥和伊健大爆指娜姐一句說話令電影結局改變，伊健說：「當日我哋拍結局嗰場過馬路戲，原定只係我一個人過馬路，留下『波波姐』（娜姐角色匿稱）喺原地。準備Roll機時，佢喺隔籬話：『咁就冇喇，好慘呀！』」娜姐覺得男女主角即場分手好可惜，不禁自言自語，點知又畀伊健聽到。旦哥則笑說：「原來伊健好八卦，聽到娜姐咁講，就走嚟向我建議另一個拍法。原本我諗住拍完快啲收工，但又唔想嘥時間同佢拗，於是照佢哋意思拍多一個Take，我剪咗佢哋都唔知啦！點知當我睇重播時毛管戙，而剪接師破例打電話畀我去評論呢個結局。多謝伊健和娜姐對電影嘅投入，先至有神來之筆嘅結局！」

錢嘉樂感謝旦哥送上婚外情

另外，錢嘉樂亦為旦哥獻上第一次：「我為咗旦哥獻出從影廿幾年嚟第一次去戲院謝票，喺戲裏面亦係第一次有愛情線，而且仲唔止有一個女人，有婚外情，大家都知喺現實生活，呢啲事冇可能會發生喺我身上。」說話令全場捧腹大笑！

而電影的音樂創作大臣陳光榮亦造就了王菀之和C Allstar的電影歌曲和配樂牽動到觀眾情緒，出場時更獲得熱烈掌聲！

伊健唱出真正Ending

另外，伊健即場被旦哥踢爆：「為免混淆觀眾感覺，我刻意唔畀男主角唱主題曲，點知拍完之後，伊健走嚟同我講話好有Feel要唱首歌延續感覺，我唔理佢，佢就去搵陳光榮，用男主角嘅角度出發，將戲裏面沖涼沉思嗰段配樂編成一首歌。我聽到時都好有Feel，准佢放入Soundtrack（原聲）入面，但戲裏面冇。」伊健大賣關子：「好多人走嚟問我到底結局係咪復合咗，其實答案喺呢首歌度。」