鄭伊健感激新片叫好叫座

鄭伊健最近頻頻為電影《分手100次》和下星期舉行的演唱會做宣傳，佢今日就同陳光榮到電台宣傳電影原聲大碟，近十年沒唱情歌的伊健指要求陳光榮為他寫歌：「原本都冇諗住出呢隻碟，但由於導演覺得唔好嘥咗陳光榮嘅音樂，不如搬落隻碟。我自己本來冇份唱，但拍完套戲就求佢寫隻歌畀我，因為覺得呢套戲個愛情世界好好。」問周秀娜可有份唱？他說：「如果佢唱埋梗係好，我唔知佢把聲點，低音都好聽架，唔係五音不全就得，不過唔知佢想唔想唱，佢已經好大壓力。」

不過他的歌未有收錄在電影內，他笑言:「所以我極力爭取有mv，加返啲電影片段。」講到電影在香港票房大收，內地卻滑鐵爐，伊健解釋：「因為大陸冇院線，原先唔係呢個時候上，做嗰時已經知，純粹我哋上去宣傳先會上嗰場，不過都盡量做宣傳，因為想推廣香港小品愛情。」他又指感激在香港叫好又叫座：「至少香港小品愛情，喺香港做到成績，原本香港都係得好少院線，係依家先多返少少，所以先成日宣傳，希望畀戲院知道反應好，會上多啲畀多啲人睇到。（失望嗎？）都唔會，至少口碑好，而且好多幕後話個配樂應該有提名。」