吳千語唔想同林峯情侶檔：咁老土

影星吳千語今日在尖沙咀出席電影《王家欣》煞科宴。她表示自己有兩部戲已煞科：「之前返內地兩個幾禮拜，嗰套都煞咗。因為呢兩部係搭住嚟拍，所以呢段時間好辛苦。」而九月會開賀歲片的她就指今年好充實。問有否時間休息？她謂：「呢幾日都有休息，返到嚟香港好開心。返到屋企嗰種感覺始終唔同，喺第二度住酒店係另外一種感覺。（旅行？）考慮吓，都可以去休息吓。（夾林峯時間？）都可以咁講，同朋友去都OK。（想去邊？）想去陽光與海灘，可以同大自然近啲嘅地方。」問到會否準備三點式？她就指今年興着一件頭：「女仔一件頭都可以好靚嘅，當然係靚嗰種一件頭，唔係泳隊嗰種。」她又指自己不喜歡綁帶式泳衣，怕游得快會甩帶。

對住男友演唔到戲

問千語是否想男友加入自己公司？她坦言沒有意見：「之前有報道話我拉攏佢，其實我未識佢之前我老闆同佢都合作咗好多次，所以冇關係。我亦都冇去加意見，因為我覺得佢都同老闆咁熟，唔使去做到咁老土。（過嚟情侶檔。）唔需要嘅，做嘢最好都唔好一齊，我自己唔係好鍾意。純粹係我哋兩個個人唔鍾意，冇其他因素。」

問是否同戲也不會演情侶？她就指從未有人邀請過他們演情侶：「會好尷尬，我好怕尷尬。（留返屋企sweet？）唔知呢，我對住佢我演唔到戲。」

叫吳尊快「找數」

在戲中與黃又南演情侶的千語就大爆有咀嘴戲：「本身就掂一掂嘅，後尾就拍多咗個take，就係我強吻黃又南。第一次強吻人就畀咗佢。」她事後覺得好怕醜。有參與「冰桶挑戰」的她就指有一個人未回應她的挑機：「就係吳尊，但係我相信佢會去響應嘅，希望佢快啲（找數）。」問為何只tag吳尊和Angelababy而不tag林峯？她笑言：「佢已經畀人tag咗好多次，佢已經擺埋片上去。」