黃又南激讚千語專業又有型

藝人黃又南今日出席電影《王家欣》煞科宴。他表示近一個月前已完成拍攝，更指自己每逢拍完都不捨得劇組：「拍咗十幾年戲都仍然有呢種感覺，好似Last Day嗰日咁，大家都好唔捨得，希望下次可以再合作。」問是否愛上對手吳千語？他就笑言：「喺戲裡面愛上咗佢，戲入面一定要愛上佢，如果唔係大家喺螢幕上睇唔到有共鳴。（幾時抽離到？）我拍完就抽得走！」他又指千語其實好男仔頭：「有時仲型過我！佢話『唉呀！行啦！快啦！』，佢係好爽快、好爽朗。」

講到同場的千語話自己獻出首次強吻戲，又南就即時變得口窒窒：「千語真係好專業，未拍之前導演都話未去到（錫）就差唔多要收，但導演就話不如拍一個（錫嘅版本）。」怕記者寫錯的又南更講得好小心：「大家真係同一時間走去刷牙。」問是否真的強吻？他就坦言不是，亦僅於兩三秒：「佢主動埋嚟錫我，但冇強吻。（好唔好咀？）我媽咪好咀啲。」他更大爆媽咪趁自己瞓覺就入房錫自己：「我媽咪到依家都有錫我面豬登！」又南又表示導演在拍咀戲前都有問千語會否介意：「甚至乎問佢需唔需要打番公司，但係千語真係好專業。（佢有打？）佢冇。」他更講笑話自己Whatsapp林峯問點算，雖然僅屬吹水，但他就繼續搞笑扮林峯：「你咪咀囉！我去碼頭接你！」他又表示林峯有來探班兩三次：「我睇得出佢哋兩個真係Sweet！」更指千語跟男友同自己傾偈的語氣大為不同。然後又南又發現千語在旁邊聽他講甚麼，場面搞笑。

談到有藝人吸毒，更有報道指圈中不少藝人亦有吸毒，又南就表示不敢作太多評論：「分分鐘人哋真係唔係，而我講咗嘅話咁樣會影響到人哋。」又指圈中人懂得潔身自愛。至於是否有人引誘過？他謂：「入行嗰年好多組合，全部都係健康人士，好似E-Kids、EO2呀，全部都跳舞。」加上之後一年屋企有事，所以連玩樂都甚少：「呢個嘢真係影響好大，唔係講笑。」