抹乾眼淚 龔柯允再披甲闖樂壇

20140824
東網電視
更多新聞短片
Karen喜歡香港樂壇是因為不用做太多「綜藝」,可以較專心做音樂。

「翻版謝安琪」龔柯允從馬來西亞來港,經著名音樂人趙增熹「調教」後正式殺入香港樂壇,曾經在馬來西亞經歷挫折的她,終日以淚洗面,如今暮然回首,一切過眼雲煙,來港後重新開始,誓要為「過江龍」爭光!

馬來西亞歌手龔柯允(Karen)由著名音樂人趙增熹提攜,鋪路殺入香港樂壇,憑着貌似謝安琪,加上獨特的聲線獲不少樂迷注意。談到與趙增熹合作,Karen大讚熹Sir指導有方:「老師要求我一Take過錄一隻慘情歌,要我放重啲感情,監製選擇鬧到我喊,但老師就相反,好溫柔咁引導我投入,仲叫我諗吓以前畀人呃嘅感覺,去培養個Feel。」

Karen來港搏殺前,有一段時間在馬來西亞及台灣做音樂,然而卻因種種原因,錄好的唱片未能順利推出,其後又因與公司出現意見分歧,導致分手收場,回望種種挫敗,Karen有感而發:「我曾經好想去香港做音樂,可惜公司唔畀我咁做,我好唔開心,只係識喊,以為喊完瞓醒就冇事,但喊到瞓唔到覺。」

欣賞學友王菲

如今事過境遷,Karen收起眼淚,重新出發,她樂觀地說:「以前太細路女,諗嘢太天真,依家就發現Everything happens for a reason,呢件事令我睇清楚世界,我唔會怨,反而更加相信自己,若果有人同你講某件事係唔啱,咁係咪真係唔啱先?未必,所以最主要係對唔對得住自己。」

身為「過江龍」的Karen一直有留意香港樂壇,如今香港的唱片業正在萎縮,何解Karen還要義無反顧地來港發展?她說:「我以前喺台灣做音樂嘅時候,感覺台灣偏向『綜藝』多啲,對我嚟講有啲辛苦,反而香港做音樂唔太需要玩娛樂,感覺舒服啲。」在芸芸香港歌手中,Karen特別欣賞張學友及王菲,她又表示以前學唱歌時曾刻意模仿王菲的唱腔,她笑說:「尤其聽王菲唱《夢中人》,佢嗰種真假音轉換真係好有Feel,學王菲唱歌把聲一定要放輕!」

似Kay惹麻煩

望落Karen與「女神」謝安琪(Kay)的確有幾分相似,所謂「美麗有罪」,Karen坦言曾因為似Kay而招惹麻煩,她說:「有次同兩個朋友去便利店買嘢,尾隨有個醉酒佬想靠近,仲話:『嘩!乜謝安琪身邊有兩個觀音兵嘅?』嚇到我即刻走呀!」