鄭伊健升呢做前輩　簽唱回顧20年

藝人鄭伊健今日在旺角為電影《分手100次》原聲大碟舉行簽唱會。在播放首次公開的《慣了吧》MV後，伊健更在唱片監製陳光榮鋼琴伴奏下即場獻唱這首歌。其後他在和粉絲玩遊戲的時間裏，鼓勵其中一位歌迷朝着自己目標進發，甚具偶像風範。最後他更與粉絲們影大合照。

伊健在台上向一名想做記者的歌迷說加油，事後他接受訪問時表示是無可厚非的事：「呢個係願望嚟，正如我當日自己入呢一行都係個夢想之嘛，終於咪做咗囉。」又表示自己身份不單是偶像，還是前輩：「講一句說話就幫到佢，咁我就會去做。」出名好人的伊健更指自己好關照新記者，不介意接受他們專訪：「甚至乎（同佢哋）話埋點樣問會好啲，都冇乜所謂嘅。我成日覺得有啲嘢要一路傳落去，我發覺娛樂圈，尤其是電視好多嘢好似失傳咗。」

開咖啡店猶疑不決

早前伊健想和拍檔周秀娜搞咖啡店，問幾時開張？他謂：「演唱會就快開，Cafe就未搵到（地方），好似愈來愈貴咁。大家都有諗緊嘅，但依家我搞咗個演唱會先。」問是否主要受租金問題阻礙而遲遲未開張？他就自爆其實是想置業：「如果我哋搵到好嘅業主，我哋都可以做，但依家就難啲囉。」而自己又去過睇一些舖位：「買嘅，有啲靚嘅又未必買得起。租嘅，啲租金又太過份，可能一加就加好多，或者一簽就簽兩年，兩年之後裝修完又加租咁你又冇得做。」所以希望找到有人情味的業主。

回顧20年

問為何娜姐沒在專輯獻聲？伊健就指在電影拍畢後才發掘到她的歌唱潛能，但未有時間試音。而這次推出電影原聲大碟亦他想起20年前和鄭丹瑞搞《姊妹情深》的電影原聲碟：「嗰時冇人敢出soundtrack，大家都只係做唱片，但係我哋都好成功。後尾一路做《風雲》、《中華英雄》，嗰時都好流行。但後尾去到一個階段，唔好話soundtrack，CD都冇乜人買。」所以沒有想過銷量可以有幾多，只想20年後再合作可以做好件事。

至於新曲《慣了吧》未能在電影中出現，問伊健會否感到可惜？他就坦言不會：「安排上係咁，冇辦法，每個人睇嘢都唔同。但我覺得咁耐做唔到情歌係因為冇呢個主題，直至到呢套戲。」又表示就算未在電影中播放，但今日能在電影院播放MV已經好足夠。他又覺得MV好特別，因為結局和戲中呈現的結局有所不同。