舊愛同場　林欣彤擰歪面避羅孝勇

林欣彤（Mag）與羅孝勇這對舊情人在慈善活動聚頭，全體歌手上台時，被大會安排他們企正中間，二人在台上零交流，表現尷尬，Mag更不時擰歪面。

記者要求他們一起接受訪問但被拒絕，Mag解釋：「公司話唔畀喎！我自己ok㗎，啱啱都同佢（羅孝勇）講嘢，佢問我隻碟幾時出，我又問番佢近排忙啲乜。」早前Mag與初戀情人傳出翻撻，問羅孝勇可有追問新戀情？Mag笑言：「冇喎。（叫初戀男友參加飢饉？）冇喎，呢啲唔使叫啦，自動自覺啦。」

Mag表示已有參加飢饉經驗，但自言胃口很大：「入行之後好多女藝人唔會食晒成個飯盒，但我係可以㗎，所以成日畀人歧視。」