出爐港姐為爆冷平反 邵珮詩勝在淡定
20140908
東網電視
更多新聞短片
三位出爐港姐因參選成為好友。
新一屆香港小姐賽果已經塵埃落定，罕有地三甲齊齊爆冷，冠軍由三料封后的邵珮詩奪得、亞軍是王卓淇、季軍則是何艷娟，外間對賽果存有爭議。三女接受專訪時為爆冷大平反，邵珮詩說：「我唔係爆冷。」同樣爆冷，但大熱倒灶的吳凱欣對邵珮詩封后寫個服字，不過被封為「民選冠軍」，吳凱欣覺得是觀眾錯愛，自覺問答環節表現恐怖！
王：王卓淇 邵：邵珮詩 何：何艷娟 吳：吳凱欣
吳凱欣輸得心服
邵：攞獎到依家都好似發緊夢咁，都知道外間對賽果有啲質疑，但睇番決賽錄影，覺得自己表現唔錯，亦唔覺賽果爆冷，我哋三個嗰晚狀態都好好，觀眾可能只係睇我哋平面嘅一面，評判現場睇騷同埋多次接觸我哋會睇得全面啲。
王：評判之前見過我哋好多次，會加深了解，我覺得自己大熱嚟㗎，唔覺得係爆冷，人有自信就會靚，我贏在呢份自信。不過，阻滯都係嚟自自信，我講嘢太直，最尾話網民意見唔使理會對分數有影響。其實之後諗番係唔可以唔理，意見要聽要改正，之前幾條題目答得幾好，點知衰收尾，依家學識要收斂少少，女人係要堅強，但都要溫柔先得人鍾意。
係實至名歸
吳：大熱同冷門其實都係傳媒講，一路訓練都知邵珮詩好有選美經驗，表現一直都好好，決賽跳舞、溜冰都做得好靚，佢係實至名歸。好多謝網民話我係民選冠軍，但佢哋可能冇睇比賽，唔知道我問答表現得有幾差，我有體育精神，做得唔好就要服輸！
何：我有睇報道但冇唔開心，負面新聞每年都實有，一定有人鍾意你，有人唔鍾意你，最緊要對自己有信心，當晚做到最好已經好開心。可能我一向低調、唔鍾意出風頭，新聞比較少大家先會覺得我爆冷，評判見過我哋好多次，好清楚我哋人品，我覺得自己贏在夠淡定。
王：我都好滿意決賽表現，問答環節大家可能以為我哋有綵排過，其實真係冇㗎，真係唔知啲問題，都畀啲問題嚇親。大會成日同我哋講問答環節係最緊要佔好多分，我覺得對答得好滿意， 答完之後開始幻想自己有機會入三甲。
王卓淇清楚定位
吳：我喺問答環節綵排表現得好好，但一有觀眾就緊張，
睇番決賽錄影，喺問答環節表現得真係好恐怖，簡直係手足無措到唔識畀反應，嗰晚係有啲發台瘟，本來可以答得好啲，但諗得太認真，唔夠膽去玩。外間對三甲有爭議，但係我睇番成個過程，佢哋三個表現真係好好，淡定又自信，自己就係輸咗呢份淡定，真係輸得抵、輸得心服口服！佢哋係實至名歸，港姐公平競爭，自己有機會但把握唔到。
王：我自信得嚟好清楚自己定位，宣布三強之後我估自己係亞軍，邵珮詩表現得好好，當時都估佢係冠軍。
邵：當時我都估會唔會有機會係冠軍或者亞軍呢。
何：宣布三強時我太激動，個腦一片空白，乜都冇諗，只係望上觀眾席睇吓見唔見到媽咪。
何艷娟吹得
邵：總括嚟講今次係好好嘅經驗，最大得着係個人淡定咗好多，以前對自己都有信心，依家多咗份觀眾認同。今次參選攞咗好大勇氣，以前未試過公開心口嘅疤痕，係女仔都鍾意靚，有呢個疤痕都有唔開心過，但係已經接受咗，參選得都預咗畀人講，希望可以跳出框框，畀人見到我係個堅強嘅女仔。
吳：比賽已經過去，冇失望就假，都要時間慢慢消化，但總算贏咗份觀眾緣，依家出街會有人認得，會叫我11號、土炮，睇吓嚟緊可以有咩發展，選得港姐當然有興趣入行，希望大家第日會記得我個名。我諗司儀就唔係咁適合我，希望有機會拍劇。
王：我想試吓做主持同拍劇，最想同王祖藍合作，覺得佢好搞笑，男神就鍾意馬國明，但係佢好似畀人私有化咗，所以只可以欣賞，哈哈……。
邵：五年班我已經移民咗去溫哥華，喺嗰邊成日睇無綫劇，想試吓做警察動作角色。
何：我口才唔錯㗎，都想做主持同拍戲，後生要接受多啲挑戰，呢個係我做人嘅目標。
後記
「友誼小姐」邵珮詩對眾佳麗照顧有加，往往在「緊急」關頭伸出援手，自然受佳麗歡迎。王卓淇透露有次去洗手間時突然發現紙巾已經用完，徬徨之際向邵珮詩求救，邵珮詩立即伸出「友誼之手」遞上紙巾，王卓淇為答謝邵珮詩的「救急」之情，在「友誼小姐」互選時也投了她一票。