懶人Ashina　靠岩盤浴去水腫

「日日運動身體好」人盡皆知，不過「嫩口謝安琪」郭奕芯卻有另類方法Keep Fit，坐擁33C逼爆上圍的她因害怕做運動曬黑一身白皙肌膚，平日只靠打羽毛球減肥。但原來她還有一個「秘密武器」保持苗條身段，就是近年在香港大熱的岩盤浴！

現年18 歲卜卜脆的郭奕芯（Ashina）青春無敵，但貪靚的她與其他女性一樣，為保持美好身段而費盡心思，「水腫」更是她的頭號敵人，她說：「由中學開始已經有水腫問題，尤其係有時去消遣，無可避免會飲少少酒，第二日可以腫到塊面、大髀同手臂會脹咗成個碼！」為有效去水腫，Ashina會注意均衡飲食及充足睡眠：「我平日唔食零食，所以我知自己係水腫多過肥，另外我飲茶多過飲水，因為茶有消脂作用，如果飲酒都盡量唔會太夜飲！」

她對付水腫的撒手鐧是近年在OL界大熱的岩盤浴！她表示岩盤浴過程輕鬆，而且適合大眾，已成為她與朋友的消閒場所：「好多時做完嘢已經好攰，唔想再做運動消耗體力，但又唔可以唔Keep Fit，做岩盤浴最正嘅地方就係唔使郁！做運動打羽毛球都話要學同練，做呢樣嘢就乜都唔使，沖完涼，淨係瞓喺度焗吓就搞掂！」

排汗掂過馬拉松

不用運動就可以瘦？真是不可思議！Ashina透露岩盤浴可以有效地大量排汗， 加速新陳代謝：「雖然我平日都會Keep住做運動，但做運動流嘅汗同岩盤浴唔同， 做運動係皮膚表面排汗，會有汗味同黏膩，但岩盤浴可以將皮膚深層嘅水分同身體入面嘅毒素溶解後排出，達到美肌嘅效果！」並指焗40分鐘岩盤浴排汗量已經等於跑完一次馬拉松：「我一星期大約會做3次，每次做完塊面都會即刻瘦咗，聽講做40分鐘嘅排汗量已經等於跑咗十公里，但跑馬拉松會攰，呢個做完就精神奕奕，成身鬆晒！」

大人細路都啱做

對岩盤浴素有研究的Ashina 稱使用不同石頭會產生不同功效，當中砭石最適合女士：「呢種石有助燃燒身體唔要嘅脂肪，消耗熱量，減肥去水腫！」她會與年長親友做岩盤浴：「有啲親人年紀較大，雙腳行動不便做運動排汗會辛苦，我都有帶佢哋嚟用呢個方法通番血管，減輕筋骨痠痛！」

砭石功效多

Ashina提到砭石有助活化人體內的熱能細胞，進而促進脂肪組織代謝分解，將多餘的脂肪消耗，達至收身之效。此外，由於岩盤浴針對皮下微循環，可以令毛囊及脂腺活性化，提高皮膚的吸收能力，改善膚質。除了砭石外，來自日本的神黑石亦有瘦身之效，據知此石目前只有在日本北海道才能開採，是一種珍貴的天然產物。