怕被指博宣傳 湯鎮業拒為翁美玲搞悼念活動

20141011
東網電視
更多新聞短片
湯鎮業(左圖右)坦言如果現還記掛舊愛翁美玲,對太太唔公平。

湯鎮業於1982年憑無綫劇集《香城浪子》成名,是當年無綫五虎將其中一員,風頭一時無兩,他接受電台訪問時問到85年前女友翁美玲自殺後他黯然離開無綫,湯鎮業正面回應說:「我好感激苗僑偉,同時又感到好抱歉,因為佢為咗我被別人指摘,不過都咁多年,佢係一個好美好嘅人,無謂摧毀佢,所以都唔需要平反!當年離開無綫,係跟報道有關,做呢一行就預咗冇自由,唔開心嘅報道就唔好睇。(唔平反唔會覺得自己『食死貓』?)作為男人,撐得住!所有事係注定嘅,反正我都捱過咗,上天會知道我係唔係好人,呢啲事令我更積極面對人生。」

湯鎮業早年曾於微博發文紀念翁美玲,被問到會否記掛已去世的舊愛,他說:「都掛念咗咁多年,如果依家我仲非常想念她,對太太都唔公道。人生確有很多畫面,唔可能將過去全部刪掉,但都要睇目前嘅人生。」問及翁美玲逝世30年可有悼念活動,他自感難做,因做甚麼都會被罵、被指博宣傳,他也有家庭壓力,因此現盡量不再提此事、不提及舊愛。