黃家強向前經理人挑機：夠膽同我一齊發誓

歌手黃家強由重慶返港，於下午3時40分在一名男助手陪同下步出機場，頭戴綠色軍帽和穿黑Tee的他停步接受訪問。對於為何日前透過微博大爆Beyond解散的「真相」，他解釋：「因為佢兩個迫我。（指前經理人陳健添Leslie和黃貫中Paul），陳健添喺微博爆一啲冇人會知嘅嘢再扭曲，鬧足我兩年幾，有啲攰，如果真係想知道嘅咪講你聽。」他又指已準備發律師信給對方。問有何要求？身旁公關代答：「主要唔好誹謗。」

發毒誓證冇講大話

談及Leslie在微博寸家強發毒誓當食生菜，家強開始顯得勞氣：「對佢嚟講係，但佢依家唔敢發，咁有乜好講？如果佢覺得發毒誓當食生菜，佢又發吓囉，睇佢敢唔敢發？（用屋企人做發誓嘅交換條件？）因為我冇講大話，有咩所謂？如果我冇講大話，屋企人咪冇事囉。因為佢一路講緊大話，佢咪驚，講完！」

愈講愈扯火

對於Leslie指阿Paul曾表示不會向家強作出回應，因不想踢爆家強講大話令家強中毒誓，家強聞言即扯火：「呢個問題問番佢，我唔答。點可能啫？依家係我發言，我覺得我冇講大話，你話我講大話，話我會死全家，因為你唔敢，佢敢唔敢發？我就夠膽！」

冇同葉世榮聯絡

問講出真相可擔心傷害Beyond另一成員葉世榮？他說：「我覺得佢會原諒我，我都同佢講對唔住。（有冇聯絡佢？）冇！冇同任何人講。（佢打畀你？）都冇。」

對於Leslie表示會提出文件做證明和反駁家強的「真相」，公關即說：「叫佢早啲拎，快啲！」問家強可有說話對Leslie講？他說：「冇，講晒，夠膽同我一齊發誓。」