顧紀筠冧爆讚老公：帶畀我好多樂趣

顧紀筠接受由楊思琦主持的有線節目訪問，期間她大爆當年離婚真相，又自爆曾猶豫再婚。談到早婚，經歷兩段婚姻及與第一任丈夫育有一子的顧老闆直言當年未了解愛情：「佢（前夫）都幾斯文、乖仔，對我又細心，試過我盲腸炎時，佢特登請假唔返工，日日陪住我。嗰時我要擔起頭家，所以好勤力做嘢，廿歲出頭已經買咗我第一層樓，有樓揸手，又有份唔錯嘅工，下一步就自然諗結婚生仔。可能太細個，唔知終身伴侶要有咩條件。」

移民加拿大導致離婚

她透露因與前夫移民加拿大而導致離婚收場：「我喺加拿大搵嘅人工係香港嘅五分之一，我過咗去加拿大幾個月完全生活唔到、儲唔到錢，工作環境又唔理想，後嚟同囝囝返番嚟香港，發覺同前夫距離愈來愈遠、又唔夾。我哋無好迫切咁離婚，而喺分居咗5年後，最後感情轉淡決定離婚。」

顧老闆稱與前夫分居時，囝囝只有一歲，但她仍選擇當單親媽媽，獨力照顧兒子。而直到她和前夫正式離婚，當時約六歲的囝囝更曾一度充當「和事佬」，希望爸媽能夠修好，但最後顧老闆仍沒有為囝囝刻意挽留婚姻。

大爆老公追求攻勢

曾失婚的顧老闆坦言對愛情不敢抱期望：「我獨身咗一段好長時間，我曾經以為我下半生會繼續單身，所以培養咗好多好『個人』嘅興趣，例如畫畫、睇書、寫作，估唔到上天仲安排咗另一段姻緣畀我。」顧老闆大爆當日老公陳仕偉追求她時，在餐廳食飯時就直接問顧老闆可否成為他的女友，而其猛烈攻勢最終成功娶得美人歸。

顧老闆直言考慮再婚時，最大的考慮為雙方的小朋友：「佢有兩個小朋友，我自己都有一個兒子，我哋兩個相處問題唔太大，但兩個家庭要磨合唔容易，我唔係好有心理準備做stepmother（繼母）。我先生嗰時鼓勵我話『你用個心對佢哋，佢哋會感受到。』」而她又Sweet爆狂讚老公：「佢做事好有衝勁，相反我個人太謹慎，船頭驚鬼船尾驚賊，同佢一齊，佢就好似我嘅火車頭，帶領到我做一啲我平時唔會做嘅嘢。而且佢份人好有幽默感，帶畀我好多樂趣。」