周柏豪惹火好玩得！
20141101
東網電視
更多新聞短片
事隔兩年多，柏豪與「玻璃杯」仍脫不了鈎。
型男周柏豪外表出眾，又是音樂才子，理應成為萬人迷。但事與願違，他屢成網民的箭靶，不論外表或網上言論，均被無限放大加以批評，兩年多前的「玻璃杯事件」至今仍為人「津津樂道」，「大文豪」之名亦一直如貼身膏藥般與柏豪分不開。面對種種挑釁，柏豪依然開朗，更「豪」言：「其實我好玩得！」
被注意係做藝人條件
模特兒出身的周柏豪擁有一眾男士為之羨慕的身形，而且運動了得兼是音樂才子，不過他似乎未能感受萬人景仰的待遇，反而處處被針對，兩年多前的「玻璃杯事件」更令他獲封「大文豪」！面對種種言論，柏豪有另一睇法：「覺得我喺網上好惹火，但我好鍾意畀人注意，做藝人要有呢個條件，若果我嘅歌因為咁而多咗人認識，其實係好事。雖然負評多，但好評更多，好評更多嘅時候，就唔會理負評有幾多。」
要成功就要睇得化
面對批評，雖然有時會介意，但柏豪深明不能被牽着鼻子走，強調自己的情緒自己控制：「冇人會想有人鬧自己、唔鍾意自己，但做幕前要睇得好化，我需要好嘅情緒控制，要將情緒控制器掌握喺自己度，而唔係人哋度，自己選擇聽定唔聽、嬲定唔嬲。我覺得如果人哋鬧我就嬲，咁好多嘢唔會成功，要成功就要識得去處理情緒同睇得化。」
「玻璃杯事件」當禮物
提到「玻璃杯事件」，柏豪反而覺得是一份對事業有幫助的禮物：「成件事好好笑，好幫到我，我冇做錯嘢，但能夠冇做錯嘢而上到各大雜誌報紙嘅頭條，係一件不可思議嘅事，我覺得係禮物。」對於「大文豪」封號，他笑言不抗拒：「多個稱號冇乜所謂，茶餐廳啲阿姐都會問：『靚仔，食咩？』唔通你又會鬧阿姐諷刺你咩？我唔抗拒『大文豪』呢個名，大家講得開心，我又唔覺得有所謂，咪由得佢順其自然。」
雖然不時有「蝦碌」事出現，但柏豪笑說：「依家世界氣氛咁緊張，大家笑吓輕鬆吓咪算囉，冇乜所謂，話我又唔會痛嘅。其實我一向有睇清楚先Post嘢，不過都錯就冇計，依家手機啲改正又衰衰哋，冇得嗌停，點知一Post就畀記者Cap咗。其實件事好玩嘅，大家唔好覺得我會唔開心先，其實我好玩得！」
唔介意網上嘅嘢
雖然現時能夠處之泰然面對網民批評，但柏豪都曾經因網民攻擊而介懷：「初出道時比較瘦，有人叫我『道友豪』，我極討厭同抗拒毒品，所以當時非常唔鍾意呢個名，會問點解網民要咁講我，仲要講我爸爸媽媽唔識教仔，嗰時會唔開心。不過做落就知呢個係必經階段，依家將所有網上嘅嘢當係玩，上網係為咗玩，藝人上網都係為宣傳，何必咁認真？我嘅生活唔係喺網上面，我唔會介意網上嘅嘢，只會介意依家生活係點。」
追貼Eason？我未係神級
去年柏豪在各大頒獎禮大豐收，更勇奪《叱咤樂壇流行榜頒獎典禮》男歌手銀獎，僅次於歌神陳奕迅（Eason）， 但他直言未夠班挑戰對方：「Eason係我偶像，係神嚟喇！我暫時唔係神級，只係獎嘅名次，唔代表我同佢距離好近，我覺得仲爭好遠，仲要向佢學習。好多謝佢畀咗好多機會我，之前我去央視做大型節目，Eason同祖兒、郭富城都有拍片為我加油，佢哋係我偶像，我唔覺得攞咗個銀獎就可以同佢哋一樣。」
自我鞭策做得更好
柏豪不敢自滿，更自我鞭策希望做得更好：「當然信心大咗，唔同媒體畀我嘅獎勵，佢哋覺得我嗰年做得好，就喺成績表印隻白兔仔，但如果做得唔好，隻白兔仔隨時會冇咗，所以要Keep住每年都要做得好。唔好睇到個成績表咁重要，反而係過程有冇學到嘢，觀眾有冇睇到你努力，呢樣先係首要，當然獎都重要，係個成功代表，但都會造成壓力。」
鍾意表達自己
即使在樂壇成績有目共睹，但外界對柏豪的形象始終是潮人多於音樂人，他亦樂於做「偶像派」：「係呀，我係偶像，好鍾意做偶像。如果行出嚟大家覺得我外表吸引，咪繼續睇外表囉，我開心！但如果有一日你發現我會寫歌唱歌，仔細了解我嘅話，我會更加開心，大家鍾意我任何一樣嘢我都開心。」
柏豪揚言生命中不能沒有音樂，只要做音樂，就能樂在其中：「做音樂係一直嘅夢想，唱歌只係其中一個表達方式，我鍾意表達自己，有時覺得寫歌同做音樂可能會好過寫字添，音樂要好多嘢配合，將一種好完整嘅感覺﹐由我個心傳去你個心，只要做到同音樂有關嘅嘢，就係我夢想。以前唔會覺得紅館係目標，因為唔關我事，淨係想做音樂，依家開到紅館（騷），我都唔知下個目標係咩？可以去邊就去邊，有歌迷需要我，我就會去唱去寫。」
話我抄阿樂？戇居！
柏豪與余文樂是圈中好兄弟，喜好相近，既愛打籃球又喜歡時裝、汽車，卻不時有兄弟決裂的傳聞，例如柏豪被指買阿樂同款車「挑機」，柏豪又因兄弟決裂而被阿樂踢出所屬籃球隊等。柏豪對傳聞一笑置之：「咁佢係好嘢嚟嘅，抄梗係抄好嘢，唔通抄衰嘢咩！阿樂鍾意嘅嘢同我相似先做到朋友，好似話我買佢同款車咁，我唔會為啖氣去買百幾萬嘅嘢，其實好戇居，架車純粹係我夢想，能力許可就買嚟獎勵自己。不過冇所謂啦，我覺得係一份娛樂報道，睇完之後得到娛樂就算。」
除了兄弟情受關注，柏豪的感情生活亦是傳媒焦點，問到何時正式公開圈外女友tephanie的身份，他大耍太極說：「要睇時機、潮流、趨勢，要睇我有冇時間處理，唔需要特別去諗，亦唔係一個計劃！」不過早前在演唱會上，他忍不住向女友公開「派糖」說：「係我嘅福分，有個咁好嘅人喺身邊支持我，希望未來嘅日子都有咁嘅福分。」看來他所說的「時機」已悄悄來到。
標準呷醋爹哋
柏豪自認是傳統男人，渴望組織家庭生兒育女，但現階段並非其首要目標：「細個覺得18歲就結婚生仔，到36歲個仔就可以養我。依家梗係覺得當時咁諗蠢啦！我冇結婚生仔時間表，隨時都得，但又可以等好耐，暫時呢一刻我答你係冇Plan過。」即使未有結婚計劃，但一談到小朋友，柏豪即滔滔不絕：「成日都會諗到底我啲仔女係點樣，我係鍾意女多啲嘅，見到人哋個仔會撩吓就算，但人哋個女我會想抱抱同錫一啖。如果生仔，我將來一定係好嚴嘅爸爸，超嚴、軍訓咁！但生女我應該咩都就晒佢，令佢開心，因為身邊好多朋友生女，我都當咗係我半個女！」
恨生女恨到發癲的柏豪，自認會是個呷醋爸爸，一想到女兒跟男友去街就「非常外父」上身：「生女就好似自己個情人咁，係一種唔同形式嘅愛。如果自己女朋友同第二個男仔出街，你會諗幾多嘢先，佢會唔會同人錫呢？會唔會同人拖手？會唔會跟人返屋企？好擔心，可能係諗多咗，但我一定好麻煩好勞嘈！如果要生小朋友，我一定要好好調節自己，因為我個人好容易受壓力影響，有啲改變時就會有壓力，所以一定要處理好啲壓力。」
後記：心思縝密「大文豪」
雖然被戲稱「大文豪」，但柏豪實在有文人的細心和觀察力。訪問當日他主動提起與記者初遇的情況，更記得記者的年資。有着如此細密的心思，其作品絕對是想向粉絲傳達其真摯的想法。或者，在取笑柏豪手誤之同時，不妨細心聆聽他的作品，了解「大文豪」的另一面。