與姜麗文世紀擁抱　鄭俊弘爆喊

歌手鄭俊弘（Fred）於九展舉行首個個人演唱會《鄭俊弘Welcome to my Dreams演唱會2014》，Fred在演唱會中途以一身棗紅色西裝示人，在台上說：「我以前夜晚聽錄音帶嗰時，想像自己係張學友唱歌，依家做到歌手好開心！」更唱出《仍唱我的歌》送給台下的婆婆，期間更唱到落下男兒淚。當他感謝婆婆湊大時，更慘變喊包，說：「多謝媽咪、家姐、舅父，舅父都嚟咗！一喊就好難唱返歌！」

之後，Fred就落台與歌迷握手，作近距離接觸，期間有瘋狂歌迷強行擁抱Fred，並強吻Fred，場面尷尬。然後，Fred行到去緋聞女友姜麗文的座位，與她來個世紀擁抱，而「外父」秦沛都有擁抱Fred，更親了他的臉頰，接著他又走到婆婆的座位親吻她的手，場面非常溫馨！

叫秦沛做「阿爸」

Fred接受後台訪問時，提到幾位緋聞女友都有來撐場，他笑言:「邊位呀？Jinny （吳若希）？Grace（王君馨）？佢哋都係？ （攬住嗰個！）好多謝佢哋嚟！」談到「外父」秦沛都有到場支持時，他稱對方為「阿爸」：「我平時係咁叫佢，因為之前一齊拍劇，好多謝佢抽空嚟，我知佢都有工作喺身，佢好鼓勵我好錫我，頭先喺後台都有影相！」當記者問到秦沛是否叫他照顧女兒姜麗文時，Fred就話對方係朋友。