大陸節目　車車北上覓愛

藝人車車（張紫櫻）早前獲邀到內地參加求偶節目，結果同一時間識到好幾位「有心人」，她說：「可能我冇拖拍，單身咗好耐已經眾所周知，傳到連內地節目製作人都知，竟然主動打畀我，問我有冇興趣北上參加佢哋交友節目，咁我抱住睇吓識唔識到新朋友嘅心態咪去試吓，仲預備咗蝴蝶酥做見面禮物送畀現場男士，點知都係冇男士肯同我『牽手』，反而有好幾個參加節目嘅女仔話鍾意我，話好鍾意我嘅性格，佢哋好熱情，冇男人鍾意唔緊要啦，你揀人，人揀你啫！冇愛情，我都有友情吖，都算係意外收鑊！」

車車雖然愛情交白卷，但友情則考滿分，早前更趁萬聖節與友人癲番晚，她說：「我咁大個女都未試過扮嘢慶祝萬聖節，啲朋友話『人總歸總要黐一次！』，依家唔黐幾時黐？咁我咪上網睇啲鬼樣點化，又買埋中式衫、假髮、假疤痕，化咗成個鐘頭妝，有咁詭異化到咁詭異，務求一係唔整，一整就要阿媽都唔認得！（伯母有咩評語？）佢話我『可愛』，激死我！」