利嘉兒靠信仰開心番：有諗過自殺

藝人利嘉兒出席美容活動，她透露跟日本藥廠有合作：「依幾年時間比較多，會研究美容資訊。同日本公司合作係因為產品質量好，有信心保證！第一次合作嘅產品係出口服液，依家已經有出埋搽面護膚產品啦。（你有冇試晒全部產品？）試晒呀，覺得好用先同佢哋合作。」她又透露自己主持的電台節目會大談扮靚心得：「有好多唔同單位嘅sponsor畀我哋試，但我唔會因為咁而幫任何人sell嘢。」

曾經想自殺

問到早前大爆拒絕出席無綫高層飯局後被雪藏後有否得到朋友關心？她表示：「有問候我，不過都估係邊個叫我去飯局，但我上次講完就唔再講啦。（係咪諗過自殺？）當年自己個人好悲觀，諗嘢好負面，真係有諗過自殺！但最後冇行動，因為諗通咗之後覺得對家人傷害好大，係好不負責任嘅行為。（有冇睇心理醫生？）冇，當時唔會覺得自己有問題架嘛！不過自從2011年信咗教後，成個人開朗咗，好多嘢都放得低。」