劉敬雯「跳」出自信心

跳舞出身的劉敬雯（奶茶）接拍一套本土舞蹈電影後開始為人認識，最近被時裝品牌睇中擔任代言人，有舞蹈底子的她直言擺甫士無難度，問到可會介意轉行性感路線？她說：「我自己對於性感真係冇乜尺度，我一身健康膚色都係健康性感啦，遲啲有客要求性感都冇問題，最緊要正面，我有練定馬甲線。」

奶茶積極與舞團組隊比賽，在訓練期間不慎受傷：「整到韌帶受傷，手尾好長，雖然好番，但會有風濕，落雨日子狀態就會差啲。除了跳舞外，她早前參演由彭秀慧執導的微電影，她透露對演戲甚有興趣：「每次新角色都要揣摩，咩角色都想試，希望第時有機會同星爺（周星馳）合作，細細個就睇佢啲戲大。」　

自小便立志加入娛樂圈的她原來曾受到不少打擊，經歷一段灰心的失意期：「有段時間唔開心想放棄，初初可能未搵到自己，好多人叫你『放棄理想，接受現實，你都咁大個，錯過咗機會啦』，搞到自己都好迷失。」幸好最後跳舞令她重拾信心，近期更將自己的故事化成音符，新歌《無謂講》充滿熱血感覺，鼓勵大家勇往直前，繼續追夢：「希望大家唔好解釋咁多，有咩都做咗先，試咗先，唔得咪算囉。」