祥仔棟篤笑尾場　叻哥爆四哥大鑊

藝人阮兆祥於伊館舉行棟篤笑《阮兆祥2014硬食博覽棟篤笑》尾場，獲黎瑞恩、拉姑與鬍鬚Kong、陳國邦一家、黃智賢、江美儀與男友、上山詩鈉、胡楓、吳雨、吳麗珠、黃寶欣、李逸朗等人撐場。開場不久，祥仔用了幾個不同的娛樂新聞做主題，如周永恒打老婆、霆鋒與王菲世紀復合、Beyond鬧翻等，將歌曲改成抵死搞笑版本。祥仔將謝霆鋒的《非走不可》改成《菲咀不可》，台下的拉姑聽到拍爛手掌，唱到歌曲的最後一句「芝芝呷醋」，暗寸栢芝知道霆鋒與舊愛復合呷醋時，拉姑即雙手掩嘴，笑到見牙唔見眼！

至於尾場嘉賓，祥仔邀請到師傅陳百祥上台同自己一齊玩棟篤笑，阿叻一上到台就立即話祥仔搶自己飯碗：「你做埋我嗰份！」當祥仔同阿叻話當年時，阿叻笑言當年係老婆秀姑追自己，當年秀姑住的大廈名叫「百祥大廈」，仲話以前有好多香港小姐追自己，但表示自己好專一：「我含辛茹苦頂佢(秀姑)幾廿年！」講到呢度，阿叻就立即拖拉姑落水，暗示自己對秀姑一條心：「拉姑都頂唔順謝賢啦！唔試過出面點會知Kong哥好！」祥仔叫阿叻爆秘密時，阿叻搞笑話淨係講謝賢都有排講：「當拉姑放棄咗佢之後，到依家個女朋友，早排都有諗過結婚嘅，但講到結婚，佢女朋友話叫謝賢去上海見吓佢阿婆，話佢阿婆係睇四哥啲戲大嘅，四哥聽到之後『撻』咗喺度！依啲都係拉姑講我知！」講完之後，全場觀眾立即尖叫歡呼！