Boxing Day變生日　朱咪咪被搞錯60大壽

藝人張智霖（Chilam）與朱咪咪出席宣揚家庭和睦的活動，身為活動推廣大使的Chilam繼續以一貫型仔打扮出場。兩人一開始在台上互笠高帽，咪咪姐先讚Chilam：「點解Chilam做人阿爸都咁靚仔？」而Chilam就話要買咪咪姐的演唱會門票。其後二人在台上分享與家人的相處之道，問到平時怎樣分配工作和家人的時間？Chilam謂：「每日只得24小時，所以工作之餘，就少啲出去玩。」而咪咪姐就謂：「我不嬲唔出去玩，除咗做嘢之外，就係留喺屋企自閉做家務。」之後她又分享一個令她當頭棒喝的經驗，事緣數年前在香港工作忙碌的她很少回去新加坡探望家人，直至一次她聽朋友講起才知道：「原來個仔唔想提起我，令我覺得好陌生，所以自此就知道唔可以同家人分開咁耐。」咪咪姐又講到自己從來沒有收聖誕禮物，只有付出，但平時仔女的一個擁抱已令她很開心，Chilam亦表示物質不重要。

搞錯朱咪咪生日

之後台上又發生一段小插曲，正當眾人都以為今日是咪咪姐的60歲生日，連大會都推出蛋糕為咪咪姐送上驚喜，但咪咪姐即驚訝地謂：「錯！我唔知點解會變咗今日生日，由今朝到依家都已經收到好多生日祝福，但其實我係十月生日。」場面十分搞笑，眾人都很驚訝，之後咪咪姐拿去生日快樂牌，稱當這是Boxing Day蛋糕，送給各位爸爸媽媽的禮物，之後咪咪姐又跟Chilam合唱《世上只有媽媽（爸爸）好》，咪咪姐又搞笑地用掌風撥熄蠟燭。接着Chilam便在台上獻唱活動主題曲。可是落台後，公關卻表示Chilam突然不做訪問，而咪咪姐亦很快已離開現場。