張美妮嫁個滿分好老公

藝人張美妮2013年與髮型屋老闆黃國強（KK）結婚，她覺得一生人得一次，所以一直都想要畢生難忘的求婚，知道老公並不是特別浪漫的男人，她亦自己開口向老公坦白心中所想，現在她回想求婚一刻都仍然甜在心頭：「最sweet真係求婚，因為老公不嬲唔會特別做好surprise嘅嘢，直到我應承結婚之後去巴黎影婚紗相，佢真係有畀心思諗過，喺巴黎鐵塔閃嘅時候向我求婚，令我好感動，佢真係會為我做啲佢覺得好老土嘅嘢！另外喺結婚前，點解令我肯定佢可以付託終身，就係佢愛屋及烏！有次我爸爸身體有少少問題，要做手術，佢自己過去探我爸爸，買嘢佢食、關心佢身體狀況，而佢從來冇特別同我提起，我覺得佢好有心，真心錫我屋企人，令我對佢加好多分！」對於生下一代，美妮就話有生bb的打算：「我好鍾意小朋友，仔女都冇所謂！」