10年心境漸變　徐子珊傾城之淚

人生匆匆幾十年，總有高低起跌，毋須在乎結果，享受過程令自己有得着才是正道！外表剛強的徐子珊屢演Madam角色，惟現實中其內心比玻璃更脆弱，失意時總是獨自承受，久而久之負能量「到頂」，她卻選擇透過喊戲發洩，為角色加入自身情緒，結果憑淚眼一併俘虜監製及觀眾，更被要求傳授秘技。

回顧投身娛樂圈的10年光景，子珊自認有很多不足，故嘗試在往後日子讓眼界衝出娛樂圈！

　

幸運之神

挾着2004年港姐冠軍之名投身娛樂圈的徐子珊，10年演藝路尚算平坦，歌、影、視、廣告幾棲瓣瓣掂。雖還未踏上影后及視后的頒獎台，但曾幾何時，子珊亦掃盡歌影視頒獎禮的新人獎，成績表絕不輸蝕！幸運地，子珊多年來獲很多不同機會降臨身上：「機會把握一次就中，唔係就會等好耐或者唔會再有，以前試過遇上角色有得發揮，但當時未準備好就浪費咗，咁相對亦有掌握得好嘅時候，又未必人哋會認同，所以好講天時地利人和！」

作為演員經常要演繹不同的角色人物，情緒方面較易受困擾，但學懂釋放內心的負能量才是重點！向來情緒化的子珊，愛把堆積的負能量投放入角色，透過眼淚釋放：「原來我都儲咗好多，有時講唔到咁多，遇上好為難、唔係咁如意時，其實可能人哋唔想，為咗大家開心我就會唔出聲，所以自己食咗好多，耐咗就累積好多負面Energy，有時都要檢討。無疑呢幾年真係拍喊戲勁咗好多，唔知點解觀眾亦好鍾意睇，我外表好Strong，原來都有軟弱同脆弱一面，反差太大，其實真正嘅我係一個喊包，真係由心喊出嚟！」由於一Row機子珊便如按掣般淚如雨下，令新一輩演員睇到目瞪口呆，不斷詢問她有何秘訣，即使NG數十次亦照樣有眼淚，問到有否喊到缺堤？她笑說：「成日都會收唔到，依家好少少，耐咗啲導演會同我講夠囉！」

喊包升呢教新血

憑喊戲吸納另一批觀眾，絕對是子珊意想不到的！不過，她認為這並非壞事，至少可為她以往多演剛強Madam角色找到平衡，更曾有監製着她指導某演員如何演繹喊戲：「監製叫我幫佢進入情緒，我認為呢個係一個釋放能量嘅渠道，如果對方Open Sense就接收到，記得嗰次係Magic Hour對方要喊，冇人幫到佢，佢好大壓力，好多環境因素，佢一個人好Lonely唔知點解決，我好希望幫到佢，咪去做囉！我叫佢望住我對眼做，聽我講對白，等佢放啲Energy出嚟，結果佢好快就情緒到，幫到人我都好開心！」

看透名利敞開心扉

從前的子珊比較自我封閉，遇上難題亦不敢開口，事事獨自解決，自然倍感吃力：「要經過難關同挫折先印象深刻，問咗人步驟係會快啲，依家畀我揀我會問，唔會怕醜，識我耐咗嘅導演或監製就覺得我有唔同潛能可以發揮，咁我知自己Selling Point 係可塑性高，同時覺得多咗份使命感，想將學到嘅嘢去幫身邊人。」近年子珊亦尋求心靈滿足，如學習瑜伽及冥想，並閱讀關於心靈的書籍了解人生：「以前成日會問點解，又會上心靈Course，了解到生命嘅Lesson人人都唔同，唔應該比較，令我個人開心好多，有前輩同我講要喊就喊，呢啲都係情緒嘅一種啫！」

2012年可算是子珊的事業高峰期，憑劇集《雷霆掃毒》成為視后大熱，雖然最終倒灶，但至少獲「最受歡迎電視女角色」作安慰，子珊回想起不禁搖頭說：「嗰時壓力好大，可以用癲咗形容，睇番轉頭真係好傻，好在最後衝刺個星期好忙，冇時間畀我諗，到頒獎禮當日心情已調節好，唔得都有着數，因為大家都戥我唔抵，嗰次令大家知道我係識演戲，呢個機會已經唔容易，之後仲多咗同事主動埋嚟同我講嘢，以前佢哋好驚我，好似會食咗佢哋咁，依家大家多咗好多交流！」

望佘生愧　自知不足

在無綫高層眼中，子珊可算是芸芸數一數二勤力、一直默默耕耘的藝人，惟她在各方面亦似乎「差緊啲」，故無綫想過在頒獎禮上頒予她「專業精神獎」作鼓勵，奈何最終胎死腹中，子珊對此淡然表示：「可能佢哋覺得我仲可以等吓啩！其實我對獎項個心態經過一段時間後都唔同晒，好似今年我去頒獎禮好開心，好輕鬆咁當個騷去做，咁點解嗰年我唔可以用呢個心態？呢啲經歷過後，其實所有嘢都會過去！」面對無綫近年鬧小生花旦荒，令劇集主角不斷重複，雖然令他們多了機會，但少不免令觀眾生厭，幸而有大師姐佘詩曼回歸並橫掃各大電視頒獎禮，打破電視史創下5料視后的紀錄，子珊亦認為有師姐助陣可增強士氣：「Team入面點可以冇Leader，有佢喺度大家都睇佢頭，有家姐喺度舒服好多，雖然冇合作過，亦未有機會，但之前大家一齊做過好幾個訪問，發覺同佢差好遠，要好好學習佢做人處事嘅態度，真係自愧不如！我係細路仔，唔係佢個Grade，差7年入行都差好遠啦！」

學以致用開心Share

子珊於過去10年一直為事業向前衝，同時發現自己有很多不足之處：「最近好多人問我點解學京劇，真係一次偶然機會，亦冇諗會有咩用，既然本身唔Expect嘅嘢會發生時咪去接受，試吓冇壞，瑜伽我都冇諗學嚟做咩，增值咗就有一日可能有用，所以又去考個初級教練牌，導師叫我試吓咪試囉，亦想去上心靈Course，其實都係唔同嘅Skills，學咗可以Share，等同喊戲可以拎出嚟同大家Share。」