陳瀅初戀追宅男 求愛重口味
20150113
東網電視
更多新聞短片
陳瀅拍攝《女》劇而入屋。
外形甜美的新進演員陳瀅（Jeannie）電暈大批宅男，但初戀竟然要親自「出手」發動攻勢，盡顯熱情主動一面！雖然兩位舊愛分別似周杰倫及方力申，但她笑言靚仔並非首選，最緊要夠大隻！
三度與梁家輝合作
模特兒陳瀅近年由加拿大返港展開銀色旅途，曾參演電影《寒戰》與《迷離夜》等，三度與影帝梁家輝合作，2014年更勇闖電視圈，於劇集《女人俱樂部》中飾演少女版陳慧珊，其後在《四個女仔三個Bar》中任主角之一，機遇令人羨慕！笑容甜美的Jeannie是不少宅男的夢中情人，但想不到初戀竟是「女追男」！
17歲遇怕醜仔
她回想17歲在加拿大讀書時，與邂逅三年的同學「嫩版周杰倫」發展初戀，個性主動的她笑言難抵對方慢吞吞，於是自行「出手」：「佢眼細細幾可愛，有少少似周杰倫，但好怕醜，鍾意我好耐都冇表白！有日Lunch時間好凍，佢着住件毛毛褸，我就伸隻手入佢個袋度拖佢，於是就開始咗！」
其後Jeannie做足廿四孝女友，幫男友做功課、揀大學及照顧起居飲食，但她自嘲惡死：「我都幾管住佢，但佢好享受喎！」可惜最後因搬屋而感情冷卻。
自認肥底拒愛排骨仔
Jeannie下一段戀情可謂180度逆轉，她笑言「反主為客」，第二任男友貌似方力申，但相當大男人：「佢外形係陽光大隻，呢次係佢主動追我，但之後對我幾惡，咩都要控制住。」經過兩次不同的相處模式，她直言成長不少：「兩段關係都麻麻哋，唔應該一邊惡晒主導晒，要平等、平衡。」
雖然兩位舊愛都甚有明星相，但Jeannie直言擇偶條件並非睇樣，反而更重視身形：「一定唔可以瘦，因為我少少肥底，如果瘦過我會冇安全感，亦要比我聰明，教到我嘢！（想幾時結婚？）希望30歲前結婚生埋BB，女仔後生啲生BB健康啲，想生兩至三
個都係仔，覺得做女仔蝕底呀！」
髮揮青春無敵
貪靚的Jeannie接受專訪期間不時轉髮型，務求更加上鏡，其後「變髮」愈玩愈過癮，索性拍了多張揈頭髮、紮小辮、紮髻、頭髮扮鬚的照片，見她無論哪個髮型都一樣上鏡，果然青春無敵！她亦自誇頭髮柔順聽話，適合拍洗頭水廣告！
學乜都唔長久
童年的Jeannie主要由婆婆湊大，家教甚嚴，難怪雖在外國長大，但依然保留中國傳統女性美德，她說：「我細個好少出街，個人都幾悶，但好感激婆婆咁嚴格，教我做女仔要檢點啲。」小時候是肥妹仔的Jeannie 興趣多多，但經常三分鐘熱度：「我細個學芭蕾舞，但有個西瓜肚腩，老師叫我唔好食咁多，於是我放棄！之後去過學琴，但畀老師拍我隻手，結果嬲咗又唔學！反而到中學時學跆拳道先OK，仲試過得獎。」
Profile
陳瀅（Jeannie）
年齡：25歲
身高：1米62
三圍：32、24.5、33