楊千嬅開騷自爆家中「靈異事件」

楊千嬅第三場紅館演唱會邀請舞王郭富城擔任表演嘉賓，城城在尾聲「安哥」才現身，觀眾興奮尖叫不停，全場人更跟城城大合唱《對你愛不完》，唱畢後城城說：「點解我揀呢首歌？因為我知道千嬅好幸福，有你哋支持佢，所以對你愛不完，所有支持千嬅嘅朋友永遠都咁愛佢！」

大讚千嬅勤力

城城表示千嬅給他的印象是很開朗、好搞笑，說一句她就笑好久。他又讚千嬅是影后，不單歌唱得好，戲又演得好！他又爆料指千嬅秘密練舞，他說：「千嬅真係好勤力，佢喺我排舞室練習，有一日我返到去做自己嘢，聽到佢間房傳嚟好熟悉嘅音樂，原來係我嘅歌喎！大家想唔想聽呀？」最後兩人合唱一曲《狂野之城》，全場high爆！

千嬅則表示工作上城城是一個好好的模範，是她好尊敬和尊重的藝人，她說：「作為後輩好好嘅學習對象，請受我一拜！」千嬅隨即單膝跪，城城亦搞笑陪她跪，千嬅續說：「多謝你喺大陸拍緊電影都專登返嚟支持我，你真係好堅，點可以長期保持6格狀態。」城城笑言已經瘦了，之後千嬅又送城城落台。

台上多謝老公

當晚千嬅更多謝老公丁子高，她說：「你哋唔好睇佢平時無乜嘢，佢對我好苛刻嚴謹架，竟然係佢鞭策得我最勁！」更自爆日前家中發生一件「靈異事件」，她說：「前日我老公要跑馬拉松一早返屋企瞓，我完騷返到屋企佢已經瞓咗，我坐喺床尾嘅地下聽歌記歌詞，突然有隻手拍我，我拎轉頭見到我老公好疑惑咁篤我膊頭，然後2個人就互相嚇到大叫！原來佢喺我後面嗌咗我15分鐘，但我一直伏喺床尾自言自語又搖頭擺腦，聽唔到佢嗌我，佢仲話我個人仲好似撞邪、鬼上身咁！」說完全場爆笑，她續說：「我哋成日喺屋企都有呢啲奇怪事發生，要拍成電影嘅話，拍得住《衝上雲霄》呀！」