勁骨痹慎入!蕭正楠大爆黃翠如床事

20150129
東網電視
更多新聞短片
蕭正楠同黃翠如次次出席活動都晒恩愛!閃死人咩!
藝人蕭正楠(Edwin)同女友黃翠如等演員齊齊出席無綫劇《師奶Madam》宣傳活動,活動上眾人穿上圍裙齊齊整手撕雞,不過佢哋邊整邊偷食,未完成都已經少咗一半雞肉,翠如仲sweet爆咁餵Edwin食雞髀,之後全部人就到酒樓大廳搵街坊試食,場面熱鬧。
受訪時,翠如就透露劇情就嚟進入高潮,會有床上戲,不過只係瞓喺同一張「單人床」。Edwin仲大爆女友「床事」,話佢等埋位嗰陣會當片場係屋企,大瞓特瞓仲扯晒鼻鼾:「試過拍拍吓戲唔見咗佢,後尾就聽到鼻鼾聲,搵個鼻鼾聲先搵番佢出嚟。(有冇騷擾到你?)騷擾到,我哋拍緊戲架嘛!後尾知道佢呼吸道唔係幾好。」聽到依度,翠如就當眾打Edwin手臂,毫不忌諱喺傳媒面前耍花槍晒恩愛。
問到佢哋接唔接受對方同其他人拍床戲?Edwin就搶答:「咁我戥佢將來個對手慘啫。」之後翠如又夫唱婦隨話:「我都係戥佢個對手慘啦!(你哋有激烈床戲?)我諗公司會益我畀個更好嘅我,如果係你(Edwin)我就唔拍喇。」
對於有報道指出佢哋有「十誡」一事,佢哋就稱冇睇過相關報道,翠如又笑指自己無規無矩,Edwin就話:「我哋兩個好簡單,一啲規條都無。」