吳若希鄭俊弘情侶檔搵銀　甜蜜整湯圓

吳若希（Jinny）和鄭俊弘（Fred）首次情侶檔出席活動，兩人以賽車手造型出現並即場比試模擬賽車遊戲，又一齊整湯圓。而Jinny演唱《越難越愛》時伴奏音樂四度「失聲」，Jinny即執生繼續清唱。活動後兩人接受訪問，提到Jinny被拍到駕新跑車出巡？Jinny謂：「咁揸得架車預咗畀人見到，但反而係介意架車泊喺屋企樓下停車場都畀人影到。（有冇同保安了解？）有同佢哋講，如果係住客影都冇辦法，但如果街外人就要注意下呢！」

吳若希生意交畀會計師打理

至於汽車登記是一間公司旗下，公司持牌人是兩名男士？Jinny表示：「自己開咗間公司交咗畀會計師打理，一位姓郭，另一個唔記得姓咩，佢哋都係會計師。（同佢哋有冇特別關係？）冇特別關係，只係會計師嚟，其實年前都有講過除咗做幕前，幕後都有投資啲小生意，所以先委託會計師處理。（係咪有人教路？）唔係，係讀Business學返嚟。」而Fred稱不懂像Jinny識開公司，所有投資都交給媽媽安排。