盤點搵命搏動作向成龍致敬

成龍入行至今超過40年，一早被中外傳媒冠以「國際武打巨星」之名，更先後於1992年及1993年憑《警察故事3》及《重案組》連奪台灣金馬獎最佳男主角！喺名成利就嘅背後，其實成龍大哥真係「有苦自己知」，佢為令拍攝效果更好，幾乎套套動作電影都會親自落場，甚少起用替身！

有網民將成龍大哥多年拍過嘅電影剪輯成短片，並精選出十大危險動作，向大哥致敬！動作包括《警察故事2》嘅跳車頂、《我是誰》嘅由21層樓高嘅大廈外牆滑到地面，以及《A計劃》嘅跳鐘樓等，真係睇見都覺得牙煙！

1985年意外最嚴重

其實大哥歷年來拍戲受傷的次數，有如恒河沙數，全身的「戰績」更多達20處！其中最嚴重的意外要數到1985年，當時大哥與譚詠麟遠赴南斯拉夫拍攝《龍兄虎弟》，劇情講到佢要由城堡跳到十呎對開的大樹，再從斜坡滑下，可惜一時跣手由50呎高空墮地，令耳骨破裂，更有尖石插入腦髓，需要進行腦部手術！而2001年拍《特務迷城》時，大哥突然下半身無法郁動，醫生診斷大哥尾椎軟骨出現問題，如果再傷及此部位，大哥隨時下半身癱瘓！

成龍大哥嘅賣力演出，為佢帶來全球累計總票房逾200億元嘅成績，總算不負大哥用生命去拍戲，難怪獲網民大讚佢嘅專業精神！

網民有話兒：

G-DragXX：成龍付出咗咁多，真係抵佢咁紅，真係好佩服佢。

平澤唯XX梓：成龍拍戲唔用替身，真係搵命搏，佢過往周不時因拍戲而整傷

A$AP_RXXky：以前邊有咁多特技，細個睇佢d（啲）戲片尾播佢d（啲）受傷片，又跌落地又跌穿頭睇見都痛

FIXX14：雖然佢真係次次親身上陣，呢d（啲）無得呃，抵佢有幾十億身家

燴XX局：最鍾意睇火拼時速 又好打又好笑