朋友爭住上契　謝天華為囝囝改名「浩飛」

剛榮升父親的謝天華出席電影《浮華宴》首映，笑言太太康復得非常之快，現在已經可以落床行，預計一、兩日後出院。談到太太為他生了一個囝囝，問可有獎勵？天華說：「漫漫長路，唔係生先有獎勵。（BB同你成個餅印？）半個餅印啦！一啲人話似我、一啲人話似佢媽咪，我覺得個嘴最似我。（見到BB係咪冧晒？）佢冧啲，瞓足成晚，我有入產房但冇剪臍帶，因為驚手勢唔好。」

囝囝請護士「飲茶」

談及入產房的趣事，天華說：「我想同BB影相嘅時候畀人嚇親，因為護士突然怪叫，原來BB請佢『飲茶』。」他又自豪地表示：「雖然阿仔出世時輕過六磅，但依家食奶嘅份量超過六磅體重嘅BB，老婆都有餵人奶，依家要留意奶粉廣告。」

努力增產搵奶粉錢

天華透露已為兒子改了中文名叫「浩飛」，希望兒子振翅高飛，英文名則由太太負責。至於做了父親會否減產陪小朋友？天華說：「增產就真，啲奶粉咁貴！依家啲朋友都爭做契爺契媽。」