網友激讚「港女」孫慧雪

近日喺無綫熱播嘅劇集《四個女仔三個BAR》，每晚除咗有四個靚女陳凱琳、陳瀅、何雁詩、劉佩玥陪住大家之外，其他嘅演員原來都勁受網友注意！其中一位，就係喺劇入面飾演張繼聰女友嘅孫慧雪。

雖然孫慧雪飾演港女，每次同張繼聰見面都迫婚，聽到男友有公務員唔做去做大律師，又大吵大鬧兼搵過第二個，但網友唔單止無眼火爆，仲要讚佢有演技！：「佢岩岩（啱啱）喺《四個女仔三個BAR》做張繼聰個ex，有三分鐘戲份，出黎（嚟）同張繼聰攤牌，由初時見面嘅內咎同不安，到表達內心不滿時既（嘅）悲憤，呀雪對佢既（o既）幼稚所作出既（嘅）厭棄，之後呀（阿）雪聲稱已經自己另有所愛，對張繼聰展示勝利姿態，最後係離別既（嘅）同情，孫慧雪個眼神真係完全交到戲，聲線語氣都一流又冇半點浮誇，真係對佢另眼相看咁。」亦有網友大讚佢生得靚女，係做女朋友嘅不二之選！

大家咪以為阿雪咁就「彈」起咗係行運呀，其實佢都捱咗好多年。2006入行嘅佢，喺《美女廚房》做過「飯」，亦拍過唔少劇集，只係近兩年先叫多啲劇份，叫做畀人留意到。

網民有話兒：

樂xx搖：著（着）3點式時仲好戲

人x公x：尋晚見到佢真人，好靚，身型又好

冇xx：又靚又有身材

阿xx文：佢平時副業係做話劇，好似係