《愛.回家》就結局 粉絲嗌NO!

20150207
東網電視
更多新聞短片
《愛.回家》就嚟結局喇,好多網民大嗌唔捨得。
歷年無綫處境劇一向深受廣大市民歡迎,而且仲係大家送飯必備嘅娛樂。由於播放時間長,所以當中有唔少經典角色深入民心,就好似近年添食完又再添食嘅《愛.回家》咁,喺將近三年嘅播出時間裏面,劇中嘅一切已經慢慢成為觀眾嘅一部分,所以早前《愛‧回家》嘅編劇組突然喺微博上透露套劇就嚟去到尾聲,立即就有網友表示《愛.回家》今次真的回家了,令到網民大嗌唔捨得!由於網民嘅理由太過五花八門,以下就由小編為大家總結三大不捨原因:
第一點:劇情寫實!就好似講緊大家身邊發生嘅事咁,尤其係「查李施律師事務所」同「戴守查律師事務所」發生過嘅事,幾乎喺大家嘅公司都發生過!
第二點:每個角色都有好大嘅發揮空間!而網民就激推《愛.回家》嘅「三大男神」曹總、木偶哥同馬壯!
第三點:日久生情!《愛.回家》由2012年3月開播,到依家已經播咗七百幾集,所以有網友話喺呢接近三年嘅日子裏面,每一日食飯睇《愛.回家》已經變成咗習慣,仲話如果之後冇咗佢都唔知點算好,真係好唔捨得咁喎!
不過老套啲講句,所謂「天下無不散之筵席」,《愛.回家》雖然就快做完,不過既然咁深入民心,唔知無綫會唔會考慮搵番同一班演員安可多一套劇呢?
網民有話兒:
Zipxx:最寫實係呢套,查理斯,戴守查發生過既(嘅)事幾乎響我公司發生過哂。曾經懷疑編劇係舊同事
xSir~:次次一聽到呢長劇完,就突然會覺得gum(咁)又2、3年,會回想下(吓)自己做過d(啲)咩
胡迪與xx:no,我成世人最鍾意既(嘅)tvb劇黎(嚟),我好唔捨得
斬碌勁xx:其實睇耐左(咗)都覺得幾正
橫檳xx:幾年黎(嚟)大台都淨係會睇呢套劇,食飯睇輕輕鬆鬆笑下(吓),有時劇情係易估,但有時都算出人意表