杜自持激讚林志美似紅酒愈嗒愈濃

林志美（Samantha）為音樂會《Timeless Samantha's Live 林志美音樂會2015》於香港演藝學院舉行，到唱完《愛不完》時，叫身後的音樂總監杜自持評分，杜自持大讚Samantha：「聽佢唱歌就好似飲紅酒咁，愈嗒愈濃！（幾多錢嘅紅酒先？）十幾萬嗰啲啦！」接著就有馮允謙以嘉賓身分出場同Samantha合唱《新宿物語》，她更大讚對方為自己最欣賞的新人。然後，Samantha換上一套全黑的歌衫登場，演唱了張國榮及陳百強的經典歌曲，還唱了三首快歌，獲全場觀眾尖叫拍手！唱完一輪快歌之後，就到C Allstar出場，並跟Samantha合唱2015年最新版本的《愛的火花》，還笑言：「我好唔想去換衫，好想同你一齊唱和音，換衫都唱緊！」

到encore部分，Samantha突然淚灑舞台，感性地說：「我做人同生活都好有態度，有我嘅執着，我嘅音樂都係，我每次上台都會覺得唔知係咪最後一次。我心裏有份熱情，有團不熄滅嘅火，但曾經有一段時間熄滅咗，好多謝你地再一次畀我肯定。」Samantha落台後，在場觀眾不肯離開，之後她再度encore唱多次《愛是不保留》，為音樂會劃上完滿句號。