最期待畫面!大王李錦聯再度互寸

20150210
東網電視
更多新聞短片
相隔幾年,大王、李錦聯再度同場教煮餸,不過二人都係忍唔住互寸,場面搞笑!

無綫下午播出嘅節目《都市閒情》有唔少婦女追睇之外,相信由李錦聯教煮嘢食嘅環節都好受網友歡迎架!點解咁講?咁就要講番自2009年起,李錦聯同安德尊(大王)被安排齊齊教煮嘢食,不過就有指因李錦聯太過貪靚,搞到大王遲收工兼嬲爆,所以兩人傳出不和,仲成日喺節目內互寸。有傳二人之間因為火藥味太重,無綫因此冇再安排佢哋同場,結果令一班網友非常失望!

事隔幾年,網友最期待嘅畫面終於出現喇!尋日二人喺《都市閒情》再度合作,首先李錦聯未有等大王,就已經先講開場白,搞到大王要跑住做節目。雖然係咁,但大王仍然唔介意,仲笑到四萬咁口同李錦聯打招呼,不過李錦聯就似乎笑唔出,仲黑晒面添!數到最好睇嘅畫面,當中梗係唔少得二人互寸啦!到環節嘅中段時,兩位就因為落龍蝦定金不換而拗一餐,真係勁好笑!落咩材料都要嘈一餐,網友睇完都話笑料百出兼抵死!講多無謂,《東網》就為大家節錄以下三節嘅精華,等大家一邊學煮餸,一邊笑唔停啦!

《開場白篇》
李錦聯:到今晚食乜餸嘅時候喇!
大王:師傅師傅,我終於都搵到呢個機會喇!
李錦聯:申請到?
大王:係呀,幾年啦都未試過同你煮餸呀!
李錦聯:大家夠懷念你嘅「無敵鴛鴦鏟」!

《落醬料篇》
大王:茄汁有冇話特別要啲咩架?
李錦聯:茄汁咪就係特別要茄汁囉。
(隔咗一陣……)
李錦聯:我哋仲要落啲芒果乳酪。
大王:可唔可以唔落芒果乳酪呢?師傅,因為嗰啲味我驚…
李錦聯:咁可以淨乳酪嘅。
大王:唔係,連乳酪都唔落呀,佢哋唔係好夾!
李錦聯:幾好食架!

《落龍蝦篇》
大王:得未?
李錦聯:(指汁)多啲啲, 濃啲咁多, 濃啲咁多,好啦你可以將個龍蝦放落去。
大王:(手持龍蝦)你畀你畀嗰個(指金不換)先啦,你放先啦!
李錦聯:你放落去先啦!
大王:你放落去先啦!
大王:唉!(最終屈服放龍蝦)

網友有話兒:
DXXXXXXXiley:今次好似收左(咗)火Z_Z

李XX粉絲:可唔可以唔落架? 我怕酸,唔怕架,我真係怕,少少,冇事

斬XX落黎:全盛時期嘅大王可以點搞破壞

膠X熊:笑到痴線,句句都有骨

有自信XX男:笑死,落唔落乳酪都嘈一餐