阿佘古仔　雙失情人節

古天樂與佘詩曼可謂圈中數一數二的筍盤，有樣貌、有事業又有錢，偏偏獨欠真愛，雙雙未能享受情人節的甜蜜氣氛！兩人於新片翻撻「初戀」，回顧戀愛史，率性的阿佘不介意坦蕩相告，曾處女下海為男友炮製心形牛扒餐而搞到一頭煙，但能博取愛郎讚賞多苦也是值得......至於低調處理感情事的古仔雖不欲透露半點冧女招數，卻於新片不斷獻橋，連對手阿佘亦大為感動！

感情事隨緣

情人節，不少愛侶均花盡心思為另一半送上驚喜，貴為影壇搶手貨的古天樂與五料視后佘詩曼，卻未能享受一般愛侶的簡單浪漫，皆因多年來被工作填滿時間，雙雙失去慶祝情人節的機會，只能與工作「談戀愛」！即使有樣有錢有地位，卻依然形單影隻，今年合作賀歲片《衝上雲霄》的二人深信命運自有安排，故對感情事抱隨緣態度！

具賢妻優勢

今年情人節過後緊接農曆新年，難得有幾日公眾假期又不用工作，阿佘與古仔均會與家人共度，阿佘透露曾於內地開工度歲：「雖然係開工，但氣氛幾濃！因為可以放煙花同炮仗，又會同工作人員聚埋一齊食飯，幾開心！」談到新年習俗，因媽媽及婆婆均廚藝了得，故阿佘自小就跟她們學整蘿蔔糕，今年亦不例外：「覺得自己呢方面都OK，如果要我煲湯去箍一個男人，我覺得唔難，反而要我煮餸難度高啲，我細細個都有代表學校參加烹飪比賽，仲攞過獎，所以做賢妻都有天分！」

重家庭長子

至於身為長子嫡孫的古仔表示新年往往要拜神，年初二、三都一定要放假：「我會約舊同事、同學食吓飯，又會去吳君如同吳 鎮宇屋企拜年，但君如好衰，成日都會避年離開香港，唔知今年點！（今年有三套賀歲片，會唔會好有壓力？）壓力就唔大，作為演員做好本分，其他嘢交畀公司，其實《衝上雲霄》好應節，情人節又係新年，拍住拖去睇好Sweet。」

空中奇緣　遊舊地遇舊人拾舊情

古仔與阿佘這對俊男美女組合，於賀歲片《衝上雲霄》浪漫談情，飾演航空公司老闆兼飛機師的古仔，當年因要接手家族生意 而被父親棒打鴛鴦，被迫與初戀情人阿佘分手，他卻被蒙在鼓裏，以為是前途理由而忍痛分手，若干年後，當了空姐的阿佘効 力古仔旗下公司，兩人因工作重遇，但內心仍忐忑不安！有次阿佘工作時發生意外，古仔為顧全大局未有即場協助，令阿佘怒火中燒，其後兩人不約而同重臨當年拍拖之地英國，結果一拍即合玩翻撻，古仔更承諾不會再放手，排除萬難與阿佘慶祝生日，更於當年分手及拍拖的地方摩天輪求婚，有情人終成眷屬！

為男炮製心形牛扒

阿佘的性格大抵較古仔爽快，談到難忘的情人節時即滔滔不絕一一告之，曾處女下海為男友炮製心形牛扒的她，當年花了一段 時間籌備，拍板後便用一天時間準備，由於首次下廚，加上是為愛人「下海」，故心情難免緊張：「我好細心㗎！嗰餐好似喺餐廳食咁有前菜沙律、蘑菇湯，主菜梗係心形牛扒啦！跟住仲有甜品朱古力蛋糕，全部都自己整㗎！」為免切心形牛扒時出錯，阿佘特意買夠兩倍分量，果然不出所料，阿佘笑說：「本來只需要兩塊就做到一個心形牛扒，結果買咗8塊，整嗰時真係有兩塊失敗變咗畸形，再唔係就煎到熟過頭，真係好好笑，搞到一頭煙！」事前更欺騙男友出外慶祝，並叮囑對方到她家中迎接，結果男友進門後大為驚喜，阿佘冧說：「佢第一句問我『乜你識煮嘢食㗎咩？』最終佢當然食晒枱上面嘅嘢啦！（畀自己幾多分？）都有70分，食得落嘅，佢都有讚話好味！」

阿佘：唔會為拍拖而拍

別以為只有阿佘為愛情默默付出，花一整天炮製大餐只為男友一句讚賞，其實亦有男士為阿佘炮製驚喜，當年阿佘還未入行，在瑞士留學期間收到男友空運高如她身形般的紙製花作情人節禮物：「收到嗰陣開心到喊，好感動！因為當時落住雪，覺得自 己好可憐，嗰時住寄宿又冇電話，即刻飛奔出去電話亭打長途電話同男友講一輪囉！不知幾淒涼，一個人孤伶伶，又讀緊書。 」回憶總是美好！時至今日阿佘身邊仍不乏追求者，惟她統統Say No，問到擇偶條件，阿佘說：「要啱Channel多於一切！（依家感情狀況點？）都係等待，姊妹唔敢再介紹，所以隨緣，其實都有人追，但係朋友囉！（想唔想拍拖？）順其自然！唔會為 拍拖而拍拖，開心就試吓。（係咪去到呢個階段都冇咩所謂喇？）一向都係咁，阿媽都冇得催。」問到新片對手古天樂向來寡 言，又是否她那杯茶？阿佘笑指工作時大家難免嚴肅一點，但收工後大夥兒便會一起食飯，期間亦有與古仔閒聊。要阿佘於荷 里活男星尊尼特普（Johnny Depp）、佐治古尼（George Clooney）及畢彼特（Brad Pitt）中選一位理想男友，她首推型男 Brad Pitt ：「梗係佢啦！本身好欣賞佢，佢個人好有味道，好有愛心，又係Family Man，去邊度搵呀？」

對古仔而言，感情事向來是其死穴，要他細說如何冧女當然不肯就範，但原來他亦懂得浪漫，今次為新作《衝上雲霄》不斷向導演獻計，如一場與翻撻的阿佘在大廳以剃鬚膏混戰的戲份，原定要求古仔擁住阿佘碌兩個半圈落地，怎料最終計錯數，多 碌半個圈，結果阿佘落地時弄到頭，古仔說：「佢個反應做得好好，我都呆咗，因為之後我講咗句情深對白，阿佘事前係唔知 嘅，到拍嗰時阿佘好感動，我就係要捉你個反應，再嚟多Take都冇呢個效果。」阿佘則表示：「冇諗過佢咁情深咁講，畀着現實嘅我都會動芳心，少少眼濕濕囉！其實戲入面好多橋都係古仔提議，發覺佢好浪漫。」問到現實生活中會否常向女仔情深對話？古仔即故作神秘：「哈哈！橋還橋，用唔用係我嘅事啦！」原來男人心同樣是海底針！

古仔：我係深不可測

另一幕於英國摩天輪下求婚的戲份，雖然劇組事前做了不少資料搜集，但很多時都就地取材，古仔竟把摩天輪的圓形環當作求 婚戒指，被全場人士大讚浪漫！問到有否試過以此招向女友求婚？他得戚地說：「梗係唔話你哋知，總之我係深不可測，講真 平時我好少拍愛情咁重嘅電影，今次係新嘗試，原來我都可以。（啲橋點度出嚟？） 我唔會單靠睇戲， 睇書可以訓練幻想！ （咁大個仔做過最冧女嘅事係咩？）唔話你知，等嗰個人出現就知，如果男仔想抄橋就睇戲啦！我可以講今次電影版同電視版 係唔同嘢，係一個全新感覺。」

視后豪得起　貴價樓照殺

貴為視后的阿佘於2003年睇準時機，以500萬元買入北角雲景道海景台，2010年以1,368萬元轉手，帳面勁賺868 萬元，3年後再 度出手，以近4,000萬元購入跑馬地紀雲峰中層單位，並以月租8.2萬元出租，作投資之用。而阿佘自住的物業乃畢架山豪宅帝 景峰帝景居，於2011年以1,850萬元買入，兩個物業市值合共逾8,000萬元。基於現時樓價高企，加上阿佘早兩年北上發展，故她兜個圈已賺6,000萬元，難怪她近日亦四出睇樓，無懼樓價高企，問到有否向投資有道的古仔取經，阿佘笑說：「拍戲嗰時就 冇，睇嚟都要問吓佢，但佢持有啲單位咁勁，億億聲，我住唔到呀！」

磚家重錘出擊　身家有10億？

古仔可算是圈中數一數二的吸金王，除收入可觀外，投資方面亦獨具慧眼，尤其買磚頭永冇失手！他出道時與家人同住旺角太 平道的500呎單位，與弟弟同睡碌架床，至2002年，古仔一擲2,800萬元買入京士柏山獨立屋，3年後賣出賺1,900萬元，更以樓 換樓方式買入同一屋苑達4,200呎的大單位自住，至2011年，片約不斷的古仔再度出擊，斥資1億2千萬元購入貝沙灣一幢面積約6,000呎的獨立屋。此外，古仔持有沙田某工業中心兩個單位，以擺放其Figure珍藏，根據2011年古仔已擁有5億元物業計算，4年後的今日，其身家分分鐘來個Double都話唔定！