犯禁忌被責怪　王璐瑤破處洗車

擁有多年駕駛經驗的模特兒王璐瑤（LuLu）表示當年18歲成人後立即考車牌，可是閒時的洗車重任卻交給爸爸及外間的車房，自嘲是「懶人」，適逢農曆年廿八則獻上了自己的「第一次」，並稱極具挑戰性：「平時洗車真係會出去洗多啲，因為出面洗有全包宴服務，會清理埋車入面，自己洗就麻煩啲，（點解今次自己洗？）年廿八要洗邋遢嘛，執屋之餘，都要自己洗車嚟迎接新一年嘅好運，由於第一次洗車，我都有問人攞貼士，睇吓有咩要注意。」

望羊年商界大展拳腳

LuLu稱必定遵守農曆新年習俗：「我洗邋遢一定會用碌柚葉加七種隨意配搭嘅花瓣嚟沖涼，可以洗走衰氣同增強運勢。（會加埋桃花？）桃花係用嚟係樹下順時針轉三個圈嘅，我每年都會買嚟咁做！」她又謂家人亦十分傳統，故農曆新年期間絕不能犯禁忌：「大年初一、二都唔可以洗頭同掃地。（有冇試過犯禁而被『開年』？）試過有一年見到對鞋好靚同做緊大減價就忍唔住買咗，點知佢哋話新年點可以買鞋，鞋鞋聲，話咗我好多日。」

問羊年有何願望？LuLu表示除希望在演藝事業順利發展外，還寄望成功勇闖商界：「我喺2014年開咗網店生意，仲有讀投資課程，想向商界發展，最想係快啲開到實體店，（賣咩？）健康食品、美容護膚、衫褲鞋襪乜都有，朋友話似一間雜貨店，我計劃嚟緊復活節會去日本同韓國入貨。」